ក្នុងជំនួបពិភាក្សាការងារជាមួយឯកឧត្ដម ម៉ម ប៊ុនហេង រដ្ឋមន្រ្ដីក្រសួងសុខាភិបាល កាលពីថ្ងៃទី០៨ ខែឧសភា ឆ្នាំ២០២០ លោកជំទាវ អេវ៉ា ង្វៀនប៊ិញ ឯកអគ្គរដ្ឋទូតបារាំងប្រចាំកម្ពុជាបានជម្រាបអំពីការផ្តល់ជំនួយរបស់បារាំងដែលមានទឹកប្រាក់ចំនួន ៤០០,០០០ អឺរ៉ូ ដល់គម្រោងស្រាវជ្រាវចំនួន៣នៅកម្ពុជា ដែលស្រាវជ្រាវលើជំងឺកូវីដ-១៩។
លោកជំទាវ អេវ៉ា ង្វៀនប៊ិញ និង ឯកឧត្ដម ម៉ម ប៊ុនហេង។
លោកជំទាវ អេវ៉ា ង្វៀនប៊ិញ ឯកអគ្គរដ្ឋទូតបារាំងប្រចាំកម្ពុជាបានថ្លែងអំណរគុណដល់មន្ត្រីគ្រប់ផ្នែក និងស្ថាប័នពាក់ព័ន្ធទាំងអស់នៃរាជរដ្ឋាភិបាលកម្ពុជា ដែលបានយកចិត្តទុកដាក់ព្យាបាលជនជាតិបារាំងដែលមានជំងឺកូវីដ-១៩ ទាំង៤០នាក់ នៅក្នុងប្រទេសកម្ពុជាឱ្យបានជាសះសើ្បយ។ ការលើកឡើងរបស់លោកជំទាវឯកអគ្គរដ្ឋទូតនេះ ក្នុងជំនួបពិភាក្សាការងារជាមួយឯកឧត្ដម ម៉ម ប៊ុនហេង រដ្ឋមន្រ្ដីក្រសួងសុខាភិបាល កាលពីថ្ងៃទី០៨ ខែឧសភា ឆ្នាំ២០២០។ នេះបើយោងតាមការផ្សាយរបស់ស្ថានទូតបារាំងប្រចាំកម្ពុជា។
លោកជំទាវ អេវ៉ា ង្វៀនប៊ិញ បានសម្តែងនូវសេចក្ដីរីករាយដែលជនជាតិបារាំងបានជាសះសើ្បយទាំងអស់ពីជំងឺកូវីដ-១៩ និងបានត្រឡប់ទៅជួបជុំគ្រួសារវិញ ក៏ដូចជាអ្នកជំងឺកូវីដ-១៩ ស្ទើរតែទាំងអស់នៅក្នុងប្រទេសកម្ពុជា។ លោកជំទាវបានគូសបញ្ជាក់ថា ស្ថានភាពនៅកម្ពុជាមានភាពល្អប្រសើរ ប៉ុន្តែយើងគួរបន្តការប្រុងប្រយ័ត្ន។ លោកជំទាវបានជម្រាបជូនឯកឧត្តមរដ្ឋមន្ត្រីអំពីគម្រោងរបស់ទីភ្នាក់ងារអភិវឌ្ឍន៍បារាំងក្នុងការផ្តល់ជំនួយឥតសំណងចំនួន២លានអឺរ៉ូ ដើម្បីផ្តល់ការគាំទ្រដល់មន្ទីរពិសោធន៍ឈានមុខគេនានាក្នុងតំបន់អាស៊ីអាគ្នេយ៍ក្នុងការប្រយុទ្ធប្រឆាំងនឹងជំងឺកូវីដ-១៩ ដែលក្នុងនោះក៏មានវិទ្យាស្ថានប៉ាស្ទ័រកម្ពុជាផងដែរ(ជាវិទ្យាស្ថានកម្ពុជាដែលមានកិច្ចសហប្រតិបត្តិការដ៏ស្អិតល្មួតជាមួយប្រទេសបារាំង)។
ក្នុងឱកាសជំនួបនោះ លោកជំទាវក៏បានជម្រាបផងដែរអំពីការផ្តល់ជំនួយរបស់បារាំងដែលមានទឹកប្រាក់ចំនួន ៤០០,០០០ អឺរ៉ូ ដល់គម្រោងស្រាវជ្រាវចំនួន៣នៅកម្ពុជា ដែលស្រាវជ្រាវលើជំងឺកូវីដ-១៩។
ឯកឧត្តម ម៉ម ប៊ុនហេង រដ្ឋមន្រ្ដីក្រសួងសុខាភិបាលបានសម្តែងការរីករាយចំពោះភាពល្អប្រសើរនៃកិច្ចសហប្រតិបត្តិការស្ទើរគ្រប់វិស័យរវាងបារាំង និងកម្ពុជា ចាប់តាំងពីឆ្នាំ១៩៩១មក ដែលមានដូចជាការបណ្តុះបណ្តាល ការស្រាវជ្រាវ សម្ភារ បរិក្ខារ និងការជួយលើវិស័យផ្សេងៗជាច្រើនទៀត៕
(សរុបដោយវិច្ឆិកា)
មតិពីមិត្តអ្នកអាន