សម្តេចនាយករដ្ឋមន្ត្រី ហ៊ុន សែន បានប្រាប់ក្រុមហ៊ុនមួយចំនួននៅកម្ពុជា ឲ្យផលិតម៉ាសក្រមាចំនួន២លាន សម្រាប់ចែកជូនដល់កម្មករ និងជនក្រីក្រ ដើម្បីពាក់ការពារនឹងជំងឺកូវីដ១៩។ សម្តេច អះអាងថា ការផលិតម៉ាសក្រមា២លាននេះ គឺជាជំហានដំបូង។
ផលិតម៉ាសក្រមា។ (រូបថត៖ Thmey Thmey.com)
ដោយសារតែការផ្ទុះឡើងនូវជំងឺកូវីដ-១៩កំពុងបង្កឱ្យកក្រើកពេញពិភពលោកនោះ ការភ័យខ្លាចនានាក៏បានកើតឡើង ទន្ទឹមគ្នាផងដែរ បានធ្វើឱ្យមានតម្រូវការប្រើប្រាស់«ម៉ាស»យ៉ាងច្រើន រហូតផលិតលែងទាន់ ហើយអ្នកលក់ម៉ាសមួយចំនួន បានឆក់ឱកាសលក់ក្នុងតម្លៃយ៉ាងថ្លៃចាប់ពី១៥ទៅ២០ដុល្លារក្នុងមួយដុំ ដែលកាលពីមុនផ្ទុះជំងឺនោះ គេលក់ក្នុងតម្លៃតែ២០០០រៀលទៅ៨០០០រៀលប៉ុណ្ណោះក្នុងមួយដុំទៅតាមគុណភាពម៉ាស ។
អ្វីដែលគួរឱ្យកោតសរសើរ និងចាប់អារម្មណ៍នោះ គឺក្រមាខ្មែរត្រូវបានក្លាយជាវត្ថុដែលអាចយកមកច្នៃជាម៉ាសយ៉ាងស្អាតដាក់លក់នៅលើបណ្តាញសង្គមហ្វេសប៊ុក ដែលមានអ្នកគាំទ្រយ៉ាងច្រើន ។
ម៉ាស់ក្រមាបានផលិតសម្រាប់ប្រជាជនកម្ពុជាទាំងឡាយ (គិតពីកុមារ) ។ (រូបថត៖ Thmey Thmey.com)
នាពិធីសំណេះសំណាលជាមួយមន្ត្រី និងក្រុមការងារបច្ចេកទេស ស្ថាបនាហេដ្ឋារចនាសម្ព័ន្ធផ្លូវក្រុងក្នុងខេត្តព្រះសីហនុ កាលពីថ្ងៃទី១ ខែមិថុនា ប្រមុខរដ្ឋាភិបាល ថ្លែងដូច្នេះថា៖«ខ្ញុំកំពុងតែឲ្យផលិតម៉ាស ដែលធ្វើពីក្រមា ដើម្បីចែកជូនកម្មករ និងអ្នកក្រីក្រ ព្រោះម៉ាស់ដែលយើងពាក់នេះ ពាក់បានតែម្តងចោល អ៊ីចឹងម៉ាសក្រមានោះ យើងអាចបោកទឹកបាន ព្រោះវាស្រួលក្នុងការប្រើប្រាស់»។
ទន្ទឹមនឹងនេះ ប្រមុខរដ្ឋាភិបាល បានក្រើនរំលឹក កុំឲ្យពលរដ្ឋទៅជួបជុំនៅកន្លែង ដែលមានមនុស្សច្រើន និងណែនាំឲ្យពលរដ្ឋប្រកាន់ខ្ជាប់អនាម័យ តាមរយៈការលាងដៃជាមួយនឹងសាប៊ូ ឬទឹកអាល់កុល និងពាក់ម៉ាស់ជាប្រចាំ./.
（បូកសរុបដោយឌីណា）
មតិពីមិត្តអ្នកអាន