យុគសម័យ - នាព្រឹកថ្ងៃទី ២២ ខែកក្កដា សម្តេចអគ្គមហាពញាចក្រី ហេង សំរិន ប្រធានរដ្ឋសភា នៃព្រះរា ជាណាចក្រកម្ពុជាបាន អនុញ្ញាតអោយលោកជំទាវ Maria Sargren ឯកអគ្គរាជទូតនៃព្រះរាជាណាចក្រ ស៊ុយអ៊ែត ដែលត្រូវបញ្ចប់អាណត្តិការទូតចូលជួបសម្តែងការគួរសម និងជម្រាបលា។
សម្តេច ហេង សំរិន បានអនុញ្ញាតអោយឯកអគ្គរាជទូតស៊ុយអ៊ែតចូលរួបសម្តែងការគួរសមមិងជម្រាលា (រូបថតៈ cnc tv)
ក្នុងជំនួបនេះ ប្រធានរដ្ឋសភា សម្តេច ហេង សំរិន បានកោតសរសើរចំពោះកិច្ចខិត ខំប្រឹងប្រែងក្នុងអាណត្តិការទូតរបស់លោកជំទាវ ដែលបានធ្វើអោយទំនាក់ទំនង និងកិច្ចសហ ប្រតិបត្តិការ រវាងប្រទេសទាំងពីរកម្ពុជា-ស៊ុយអ៊ែត បានឈានដល់កំរិតខ្ពស់មួយ គួរឲ្យកត់សំគាល់។
សម្តេចអគ្គមហាពញាចក្រីហេងសំរិន បានថ្លែងអំណរគុណ ចំពោះរាជរដ្ឋាភិបាល និងប្រជាជនស៊ុយអែត ដែលបានរួមចំណែកស្វែងរកសន្តិភាពនៅកម្ពុជា ហើយនៅក្នុងចំណោមប្រទេសសមាជិក សហគមអឺរ៉ុប ស៊ុយអែត តែងគាំទ្រការ អភិវឌ្ឍន៍នៅកម្ពុជាស្ទើតែគ្រប់វិស័យ។ ជាមួយគ្នានេះ សម្តេចប្រធានរដ្ឋសភាបានអរគុណ ចំពោះប្រទេសស៊ុយ-អ៊ែត តាមរយៈអង្គការ SIDA ដែលបានជួយជំនួយបច្ចេកទេសដល់រដ្ឋសភា លើការអភិវឌ្ឍន៍ និងលើកកំពស់សមត្ថភាពរបស់តំណាងរាស្ត្រ និងមន្រ្តីជំនាញតាម រយៈការ រៀបចំទស្សនកិច្ចសិក្សា ការរៀបចំសិក្ខាសាលា និងវគ្គបណ្តុះ បណ្តាលនានា។
ទិដ្ឋភាពនៃជំនួប (រូបថតៈ cnc tv)
សម្ដេចអគ្គមហាពញាចក្រី ហេងសំរិន ប្រធានរដ្ឋសភាកម្ពុជា បានស្នើដល់លោកជំទាវឯកអគ្គរដ្ឋទូតស៊ុយអែតដែលនឹងបញ្ចប់អាណត្តិការទូត ជួយជំរុញអ្នកវិនិ យោគទុន និងទេសចរណ៍ស៊ុយអែត ឲ្យមកបណ្ដាក់ទុន និងទស្សនានៅប្រទេស កម្ពុជាឲ្យបានចំនួនច្រើនថែមទៀត។
សូមជំរាបថា ទីភ្នាក់ងារអភិវឌ្ឍន៍ របស់ស៊ុយអែត SIDA បានផ្ដល់ហិរញ្ញប្បទានអភិវឌ្ឍន៍ ដល់កម្ពុជាប្រមាណជាង១០០ លានដុល្លារសហរដ្ឋអាមេរិក នាពេលកន្លងមកនេះ៕
(យោងតាម cnc tv ប្រែសម្រួលដោយ ស្រីព្រេជ)
មតិពីមិត្តអ្នកអាន