នៅថ្ងៃទី៣០ កក្កដានេះ សម្ព័ន្ធសង្គ្រោះទន្លេមេគង្គបានរៀបចំវេទិកាសាធារណៈស្តីពីអនាគតទន្លេមេគង្គ។ ជាកិច្ចពិភាក្សាដែលមានការចូលរួមពីតំណាងសហគមន៍ជាតិ និង អន្តរជាតិ និង ប្រជាពលរដ្ឋដែលរស់នៅតាម ដងទន្លេមេគង្គ។
ប្រទេសកម្ពុជា វៀតណាមនិងថៃរៀបចំឡើងវេទិកាសាធារណៈស្តីពីអនាគតទន្លេមេគង្គ
ក្នុងកិច្ចពិភាក្សានោះ តំណាងសហគមន៍មកពីវៀតណាម ថៃ និង កម្ពុជា បានលើកឡើងពីក្តីបារម្ភរបស់ពួកគេជុំវិញអនាគតទន្លេមេគង្គដែលរងផលប៉ះពាល់ដោយសារតែការសាងសង់ទំនប់វារីអគ្គិសនីរបស់ចិន។
ប្រជាពលរដ្ឋតំណាងសហគមន៍ចំនួន៣ប្រទេសមាន ប្រទេសវៀតណាម ថៃ និង កម្ពុជា នៅថ្ងៃនេះ បានបើកកិច្ចពិភាក្សារួមគ្នា ស្តីពី អនាគតទន្លេមេគង្គ ដែលកំពុងរងការគំរាមគំហែងដោយសារតែការសាងសង់ទំបន់វារីអគ្គិសនី។
ពលរដ្ឋអះអាងថា ទន្លេមេគង្គគឺមានធនធានដ៏សម្បូរបែប និងជាប្រភពដ៏សំខាន់មួយសម្រាប់ជីវភាពរស់នៅរបស់ប្រជាពលរដ្ឋរាប់លាននាក់នៅតាមដងទន្លេដ៏ធំមួយនេះ។ ទន្លេមេគង្គអនុញ្ញាតឱ្យពួកគេប្រកបរបរចិញ្ចឹមជីវិតដោយពឹងផ្អែកលើការនេសាទត្រី និង ការធ្វើដំណាំកសិកម្មនានា។ ក៏ប៉ុន្តែ ទន្លេមេគង្គបានរងការគំរាមកំហែងជាច្រើន ក្នុងរយៈពេលប៉ុន្មានទសវត្សរ៍ចុងក្រោយនេះ ដោយសារ ការសាងសង់ទំនប់វារីអគ្គិសនី ការអភិវឌ្ឍន៍ហេដ្ឋារចនាសម្ព័ន្ធទីក្រុង ការប្រែប្រួលអាកាសធាតុ និងការនេសាទហួសកម្រិត។
បើតាមការអះអាងពីអ្នកជំនាញក្នុងកិច្ចពិភាក្សា បានឱ្យដឹងថា តំបន់ដីសណ្តទន្លេមេគង្គ ដែលនៅភាគខាងត្បូងប្រទេសវៀតណាម និង ជាចំណុចចុងក្រោយបង្អស់នៃទន្លេមេគង្គ កំពុងជួបបញ្ហាបាក់ស្រុតដី និង លិចលង់ ដែលជាលទ្ធផលពីការបូមទឹកចេញពីក្រោមដីរបស់ប្រជាពលរដ្ឋ ដើម្បីស្រោចស្រង់ដំណាំ និងការសាងសង់ហេដ្ឋារចនាសម្ព័ន្ធផ្សេងៗ។ បន្ថែមពីលើនេះទៀត តំបន់ទន្លេមេគង្គនៅក្នុងប្រទេសកម្ពុជាក៏ទទួលរងផលប៉ះពាល់យ៉ាងច្រើនពីការសាងសង់ទំនប់វារីអគ្គិសនីនៅប្រទេសចិន និង ឡាវ ដែលនេះនឹងធ្វើឱ្យប៉ះពាល់យ៉ាងធ្ងន់ធ្ងរដល់បឹងទន្លេសាបដែលជាប្រភពទ្រទ្រង់ជីវិតមួយដ៏សំខាន់របស់ប្រជាពលរដ្ឋកម្ពុជា។
តំណាងសហគមន៍ចំនួន៣ប្រទេស បានស្នើដល់ភាគីពាក់ព័ន្ធធ្វើយ៉ាងជួយសង្គ្រោះទន្លេមេគង្គឡើងវិញ តាមរយៈការកាត់បន្ថយគម្រោងទំនប់វារីអគ្គិសនី ហើយមុននឹងសាងសង់គួរសិក្សាពីផលប៉ះពាល់ឱ្យគ្រប់ជ្រុងជ្រោយជៀសវាងបង្កជាផលពិបាកដល់ប្រជាពលរដ្ឋ និង បរិស្ថាន។
ជាការកត់សម្គាល់ នៅប៉ុន្មានឆ្នាំចុងក្រោយនេះ គម្រោងអភិវឌ្ឍនានា និង ការសាងសង់ទំនប់វារីអគ្គិសនី បានកើតមានជាបន្តបន្ទាប់។ទំនប់វារីអគ្គិសនី ត្រូវបានអ្នកជំនាញផ្នែកបរិស្ថាន អះអាងថា គឺជាមូលហេតុចម្បងបំផុតដែលកំពុងរុករាន និង បំផ្លិចបំផ្លាញប្រព័ន្ធទន្លេមេគង្គដ៏មហិមានេះ។ ហើយបញ្ហានេះនឹងបង្កឱ្យមានផលប៉ះពាល់ដល់បរិស្ថានដែលនឹងគំរាមកំហែងដល់ជីវភាពនិងវប្បធម៌រស់នៅរបស់ប្រជាពលរដ្ឋនៅតាមបណ្តោយដងទន្លេមេគង្គ៕
(យោងតាម vayofm សរុបដោយវិច្ឆិកា)
មតិពីមិត្តអ្នកអាន