ប្រមុខដឹកនាំនៃប្រទេសឡាវ លោក ថងលូន ស៊ីស៊ូលីត នឹងមកបំពេញទស្សនកិច្ចផ្លូវការនៅកម្ពុជា ចាប់ពីថ្ងៃទី១២-១៣ កញ្ញា ដើម្បីពង្រឹងទំនាក់ទំនង និងកិច្ចសហប្រតិបត្តិការ បម្រើផលប្រយោជន៍ប្រទេសទាំងពីរជាពិសេសពិភាក្សារឿងជម្លោះព្រំដែន ដែលកងទ័ពនៃប្រទសពីរប្រឈមមុខដាក់គ្នាកាលពីពេលថ្មីៗនេះ។ នេះបើតាមក្រសួងការបរទេស និងសហប្រតិបត្តិការអន្តរជាតិកម្ពុជា កាលពីថ្ងៃទី៧កញ្ញា ឆ្នាំ២០១៩។
នាយករដ្ឋមន្ត្រីកម្ពុជា សម្តេចតេជោ ហ៊ុន សែន និងសមភាគីឡាវ លោក ថងលូន ស៊ីស៊ូលីត (រូបថត៖ vayofm.com)
ដំណើរទស្សនកិច្ចរបស់នាយករដ្ឋមន្ត្រីឡាវនាពេលនេះ ធ្វើឡើងតាមសំណើរបស់នាយករដ្ឋមន្ត្រី ហ៊ុន សែន ប្រមុខដឹកនាំរាជរដ្ឋាភិបាលកម្ពុជា និងក្រោយពេលដែលលោក ប្រាក់ សុខុន រដ្ឋមន្ត្រីការបរទេសកម្ពុជា បានទៅទស្សនកិច្ចនៅប្រទេសឡាវ ដើម្បីពិភាក្សាពីរឿងព្រំដែននៃប្រទេសទាំងពីរ។ បើតាមសេចក្តីប្រកាសព័ត៌មានរបស់ក្រសួងការបរទេសកម្ពុជា លោក ប្រាក់ សុខុន ប្រមុខការទូតកម្ពុជា បានជួបផ្ទាល់ជាមួយរដ្ឋមន្ត្រីក្រសួងការបរទេសឡាវ ដោយបានពិភាក្សាគ្នាផងដែរ អំពីដំណោះស្រាយបញ្ហាព្រំដែននៅសេសសល់ និង កិច្ចសហប្រតិបត្តិការរវាងប្រទេសទាំងពីរ។
ប៉ុន្តែយ៉ាងណាក៏ដោយក្នុងដំណើរទស្សនកិច្ចរបស់ប្រមុខការទូតកម្ពុជា ទៅប្រទេសឡាវកាលពីថ្ងៃទី០៥ និង ទី០៦ ខែកញ្ញា ឆ្នាំ២០១៩ លទ្ធផលយ៉ាងណានោះ ពុំបានបញ្ជាក់នៅក្នុងសេចក្ដីប្រកាសព័ត៌មានឡើយ ដោយគ្រាន់តែបញ្ជាក់ថា ប្រមុខការទូតនៃប្រទេសទាំងពីរ បានឯកភាពគ្នាធ្វើយ៉ាងណាឱ្យដំណើរទស្សនកិច្ចរបស់នាយករដ្ឋមន្ត្រីឡាវ មកកម្ពុជាធ្វើឡើងដោយជោគជ័យប៉ុណ្ណោះ។
ជាកត់សម្គាល់ ក្នុងដំណើរទស្សនកិច្ចនៅប្រទេសឡាវ របស់ប្រមុខកាតទូតប្រទេសកម្ពុជា លោក ប្រាក់ សុខុន និងការមកទស្សនកិច្ចនៅកម្ពុជារបស់នាយករដ្ឋមន្ត្រីឡាវ នៅថ្ងៃទី១២-១៣ កញ្ញា ខាងមុខនេះ បន្ទាប់ពីមានជម្លោះព្រំដែនកើតឡើងជាថ្មីនៅក្នុងខេត្តព្រះវិហារ កាលពីខែសីហា ធ្វើឱ្យកងព័ពដែលការពារព្រំដែននៃប្រទេសពីរ ប្រឈមមុខដាក់គ្នា តែពុំមានផ្ទុះអាវុធដាក់គ្នានោះឡើយ។
គួររំលឹកផងដែរថា កម្ពុជានិងឡាវ កាលពីឆ្នាំ២០១៧ បានឈមមុខដាក់គ្នារឿងបញ្ហាព្រំដែនដែនម្ដងរួចមកហើយ រវាងខេត្តស្ទឹងត្រែងរបស់កម្ពុជា និងខេត្តអាតាពើប្រទេសឡាវ។ ប៉ុន្តែក្រោយមកប្រមុខដឹកនាំនៃប្រទេសប្រទេសទាពីរកម្ពុជា-ឡាវ បានឯកភាពគ្នាដកទ័ពរៀងខ្លួននៅតំបន់មានជម្លោះនោះ ក្រោយជំនួបពិភាក្សាគ្នា៕
ប្រភព៖ vayofm.com
(ហេង វុធ្ធី)
មតិពីមិត្តអ្នកអាន