លោក សុខ ចិន្តាសោភា រដ្ឋមន្ត្រីប្រតិភូអមនាយករដ្ឋមន្ត្រី អគ្គលេខាធិការក្រុមប្រឹក្សាអភិវឌ្ឍន៍កម្ពុជា បានទទួលជួបពិភាក្សាការងារជាមួយលោក Alexander Feldman ប្រធានក្រុមប្រឹក្សាធុរកិច្ចសហរដ្ឋអាមេរិក-អាស៊ាន (US-ASEAN Business Council) និងគណៈប្រតិភូមកពីក្រុមហ៊ុនអាមេរិកធំៗចំនួន១២ក្រុមហ៊ុន នារសៀលថ្ងៃទី០៩ ខែកក្កដា ឆ្នាំ២០១៩ នៅក្រុមប្រឹក្សាអភិវឌ្ឍន៍កម្ពុជា។
ទំនាក់ទំនងពាណិជ្ជកម្មកម្ពុជា-អាមេរិកនៅតែមានលក្ខណៈវិជ្ជមាន
ក្នុងជំនួបរវាងលោក ប៉ាន សូរស័ក្កិ ជាមួយគណៈប្រតិភូក្រុមប្រឹក្សាធុរកិច្ចអាមេរិក-អាស៊ាន (US-ASEAN Business Council) ដឹកនាំដោយលោក Alexander Feldman និងមានការចូលរួមពីលោក Michael Newbill ភារធារីនៃស្ថានទូតអាមេរិក ប្រចាំនៅកម្ពុជា បានឱ្យដឹងថា ទំនាក់ទំនងពាណិជ្ជកម្មរវាងកម្ពុជា-អាមេរិក នៅតែមានលក្ខណៈវិជ្ជមាន មិនមានសញ្ញាណថមថយឡើយ ខណៈភាគីទាំងពីរបានបង្ហាញឆន្ទៈក្នុងការបន្តពង្រឹងកិច្ចសហប្រតិបត្តិការលើវិស័យធុរកិច្ច និងវិនិយោគ រាប់ចាប់តាំងពីទំនិញប្រើប្រាស់ប្រចាំថ្ងៃ រហូតដល់សេវាកម្មបច្ចេកវិទ្យា និងពាណិជ្ជកម្មអេឡិចត្រូនិក។ នេះបើការបញ្ជាក់នៅលើទំព័រហ្វេសប៊ុករបស់ក្រសួងពាណិជ្ជកម្ម។
ក្រសួងពាណិជ្ជកម្មកម្ពុជា បានឱ្យដឹងទៀតថា នៅក្នុងជំនួប លោក Alexander Feldman រួមជាមួយតំណាងសាជីវកម្មធំៗរបស់អាមេរិក មានដូចជា ConocoPhillips, Ford, General Electric (GE), Chevron, Coca-Cola, Facebook, Amazon Web Service, Oracle, Google, Master Card និង Visa Card សុទ្ធតែបានបង្ហាញសុទិដ្ឋិនិយមចំពោះទីផ្សារកម្ពុជា និងមានបំណងបណ្តាក់ទុនបន្ថែម ដើម្បីជំរុញកំណើនសេដ្ឋកិច្ច និងពាណិជ្ជកម្មនៃប្រទេសទាំងពីរ។ យ៉ាងណាក៏ដោយ ការអនុវត្តស្តង់ដារថយន្តអាស៊ាន, នីតិវិធីនាំចូលសម្ភារបរិក្ខាពេទ្យ និងគ្រឿងម៉ាស៊ីនសម្រាប់បម្រើវិស័យអាកាសចរណ៍, ការទប់ស្កាត់សកម្មភាពរត់ពន្ធផលិតផលកូកា-កូឡាឆ្លងដែន, ពាណិជ្ជកម្មអេឡិចត្រូនិក និងការអភិវឌ្ឍសេដ្ឋកិច្ចឌីជីថល គឺជារបៀបវារៈដែលបានលើកឡើងដោយភាគីអាមេរិក។
លោក សុខ ចិន្តាសោភានិងលោក Alexander Feldman
ជាការឆ្លើយតប លោក ប៉ាន សូរស័ក្តិ បានស្វាគមន៍ចំពោះគណៈប្រតិភូ ក្រុមប្រឹក្សាធុរកិច្ចអាមេរិក-អាស៊ាន និងបានប្រាប់លោក Alexander Feldman និងតំណាងសាជីវកម្មទាំងអស់ អំពីកិច្ចខិតខំប្រឹងប្រែងរបស់រាជរដ្ឋាភិបាលកម្ពុជា ក្នុងការដាក់ចេញនូវយុទ្ធសាស្ត្រ និងកម្មវិធីកំណែទម្រង់នានា ដើម្បីលើកកម្ពស់ឧត្តមភាពប្រកួតប្រជែងរបស់កម្ពុជា និងការពារអត្ថប្រយោជន៍ជូនវិស័យឯកជន ដែលជាក្បាលម៉ាស៊ីនដ៏សំខាន់នៃកំណើនសេដ្ឋកិច្ចជាតិ។ លោកបានធ្វើការបកស្រាយនូវសំណួរទាំងឡាយ របស់តំណាងសាជីវកម្មអាមេរិក និងបានគូសបញ្ជាក់ពីប្តេជ្ញាចិត្តរបស់ក្រសួងពាណិជ្ជកម្មក្នុងការបន្តលើកស្ទួយបរិយាកាសធុរកិច្ច និងវិនិយោគ ព្រមទាំងកិច្ចសម្រួលពាណិជ្ជកម្ម ដើម្បីទាក់ទាញការវិនិយោគបន្ថែមពីបរទេស។ លោក ប៉ាន សូរស័ក្កិ ក៏បានបញ្ជាក់ជូនជូនគណៈប្រតិភូ ក្រុមប្រឹក្សាធុរកិច្ចអាមេរិក-អាស៊ាន ពីភាពដឹកនាំរបស់ក្រសួងពាណិជ្ជកម្ម នៅក្នុងការចរចាបង្កើតកិច្ចព្រមព្រៀងពាណិជ្ជកម្មសេរីអាស៊ាន និងដៃគូ រួមមាន អាស៊ាន +១, អាស៊ាន +៣ និងអាស៊ាន +៦ ព្រមទាំងកិច្ចប្រឹងប្រែងលុបបំបាត់របាំងពន្ធគយ និងគោលនយោបាយគាំពារនិយមជាដើម។
ក្រសួងពាណិជ្ជកម្មកម្ពុជា បានឱ្យដឹងទៀតថាកាលពីឆ្នាំ២០១៨កន្លងទៅ ទំហំពាណិជ្ជកម្មទ្វេភាគីកម្ពុជា-អាមេរិក សម្រេចបាន ៤,២៦៤លានដុល្លារ គឺបានកើនឡើងប្រមាណ ២៣% ធៀបនឹងឆ្នាំ២០១៧។ ទន្ទឹមគ្នានេះ គិតត្រឹមខែមេសា ឆ្នាំ២០១៩ ទំហំពាណិជ្ជកម្មសរុបនៃប្រទេសទាំងពីរ សម្រេចបានទឹកប្រាក់ ១,៦៥៦លានដុល្លារ គឺបានកើនឡើង ២៣,៧១% ធៀបនឹងរយៈពេលដូចគ្នា នៅក្នុងឆ្នាំ២០១៨៕
（សរុបដោយវិច្ឆិកា）
（ប្រភពព័ត៌មាន: vayofm និង freshnewsasia）
មតិពីមិត្តអ្នកអាន