បន្ទាប់ពី ពិធីប្រគល់-ទទួល អំណោយវ៉ាក់សាំងកូវី១៩ ពីមិត្តចិនរួចហើយនោះ សម្តេចតេជោ ហ៊ុន សែន បានមានប្រសាសន៍ថាចំនួនវ៉ាក់សាំងកូវីដ១៩ដែលផលិតចេញនៅលើពិភពលោក ពេលនេះមានចំនួនតិចជាងតម្រូវការ ។ ប្រទេសជាច្រើនមានលទ្ធភាពទិញវ៉ាក់សាំងកូវីដ១៩ ប៉ុន្តែពុំមានវ៉ាក់សាំងដើម្បីឱ្យពួកគេទិញឡើយ។ សម្តេចតេជោនាយករដ្ឋមន្ត្រីបាន បង្ហាញមោទនភាព ដែលកម្ពុជាបានទទួលវ៉ាក់សាំងកូវីដ១៩ នាពេលនេះដោយសារតែកិច្ចសហប្រតិបត្តិការដ៏ល្អជាមួយមិត្តចិននារយៈពេលកន្លងមក ។
ទីតាំងចាក់វ៉ាក់សាំងកូវីដ-១៩ សម្រាប់បុគ្គលិកសុខាភិបាល និងនគរបាល។ (រូបថត៖ Thmey Thmey.com)
វ៉ាក់សាំងដែលបានបញ្ជូនមកដល់កម្ពុជានៅថ្ងៃទី០៧ ខែកុម្ភៈ ឆ្នាំ២០២១នេះ មានចំនួន៦០ម៉ឺនដូសក្នុងជំហានដំបូង ដោយក្នុងនោះចំនួន៣០ម៉ឺនដូសសម្រាប់ក្រសួងសុខាភិបាល និង៣០ម៉ឺនដូសទៀត សម្រាប់ផ្នែកយោធា។
ក្រសួងសុខាភិបាល បន្តចាក់វ៉ាក់សាំងកូវីដ-១៩ ស៊ីណូហ្វាម ដល់ក្រុមគ្រូពេទ្យ បុគ្គលិក-មន្ត្រីសុខាភិបាល និងកងកម្លាំង ទាំងអស់ដោយឈរលើគោលការណ៍ស្ម័គ្រចិត្ត ។ ចាប់ពីថ្ងៃចន្ទ ទី២២ កុម្ភៈ នៅក្នុងរាជធានី- ខេត្ត ចំនួន១០ គឺរាជធានីភ្នំពេញ បាត់ដំបង បន្ទាយមានជ័យ ឧត្តរមានជ័យ ប៉ៃលិន កោះកុង ព្រះសីហនុ ស្វាយរៀង ពោធិ៍សាត់ និងខេត្តកែប។
សម្រាប់អ្នកអាទិភាព ដែលក្រសួងសុខាភិបាលបានចេញសេចក្ដីប្រកាសកន្លងមក អាចទៅទទួលការចាក់វ៉ាក់សាំងកូវីដ-១៩ ស៊ីណូហ្វាម បាននៅទីតាំងដែលក្រសួងសុខាភិបាលធ្លាប់បានប្រកាសជូនគឺ មន្ទីរពេទ្យព្រះអង្គឌួង មន្ទីរពេទ្យមិត្តភាពខ្មែរ-សូវៀត មន្ទីរពេទ្យកាល់ម៉ែត និង មន្ទីរពេទ្យកុមារជាតិ។
ក្នុងសេចក្ដីជូនព័ត៌មាន ក្រសួងសុខាភិបាល ក៏បានក្រើនរំលឹកដល់ អ្នកបានចាក់វ៉ាក់សាំងកូវីដ-១៩ លើកទី១( ដូសទី១) ត្រូវមកទទួល វ៉ាក់សាំងលើកទី២(ដូសទី២) ក្នុងរយៈពេលចាប់ពី១៤ថ្ងៃ ដល់២៨ថ្ងៃ រាប់បន្ទាប់ពីថ្ងៃចាក់វ៉ាក់សាំងថ្ងៃទី១មក។ ការមកទទួលវ៉ាក់សាំងលើកទី២នេះ មិនត្រូវឲ្យលើសរយៈពេល២៨ថ្ងៃនោះទេ។
សម្រាប់ក្រុមមនុស្ស ដែលមានវ័យចាប់ពី១៨ឆ្នាំ ដល់ ៥៩ឆ្នាំ ដែលបានស្ម័គ្រចិត្តចាក់វ៉ាក់សាំងកូវីដ-១៩ ស៊ីណូហ្វាម ប៉ុន្តែស្ថិតក្រៅក្រុមអាទិភាព ក្រសួងសុខាភិបាល មិនទាន់អនុញ្ញាតឱ្យចាក់វ៉ាង់សាំងកូវីដ -១៩ នោះទេ ដោយរងចាំការប្រកាសជាថ្មីរបស់ក្រសួងសុខាភិបាល./.
(បូកសរុបដោយឌីណា)
មតិពីមិត្តអ្នកអាន