មុខវិជ្ជាដំឡើងគ្រឿងចក្ររ៉ូបូតសម្រាប់កុមារ ជួយជំរុញឧស្សាហកម្ម ៤.០ កម្ពុជាឆ្ពោះទៅមុខ
កុមារបញ្ជាគ្រឿងយន្តពីកម្មវិធីបច្ចេកវិទ្យាលាយនឹងការកម្សាន្ត។
ស្ថិតក្នុងចំណោមសិស្សានុសិស្សចំនួន ១០ នាក់យុវតី សំឡូត រីណា និង រិទ្ធ សុខានាថ បង្ហាញទឹកមុខរីករាយនៅពេលឃើញរ៉ូបូតរថយន្ដកង់ ២ របស់ខ្លួនដំណើរការយ៉ាងរលូនទៅតាមការបញ្ជាលើកម្មវិធីទូរស័ព្ទដៃ ក្រោយពីចំណាយពេលប្រមាណកន្លះម៉ោងផ្គុំបំណែកគ្រឿងចក្រតូចៗក្រោមការបង្ហាត់បង្ហាញរបស់គ្រូជំនាញ។
និយាយបណ្ដើរ ដៃបញ្ជារ៉ូបូតរថយន្ដប៉ុនបាតដៃរត់លើតុដែលពោរពេញដោយគ្រឿងបន្លាស់យានយន្ដតូចៗបណ្ដើរ យុវតី សំឡូត រីណា មកពីសាលាឯកជនមួយបានបង្ហាញពីចំណាប់អារម្មណ៍ចំពោះការសិក្សារ៉ូបូតបានប្រាប់ថា៖ "វាមានលក្ខណៈប្លែក បែបវិទ្យាសាស្ដ្រ និងពិតជាអស្ចារ្យ។ វាគ្រាន់តែជាគ្រឿងបន្លាស់តិចតួចដែលយើងផ្គុំចូល យើងអាចបញ្ជាវាបានជាមួយកម្មវិធីទូរស័ព្ទ។ វាជួយដល់ការត្រិះរិះពិចារណា"។
ការដំឡើងគ្រឿងយន្ដ ឬរ៉ូបូតជាមុខវិជ្ជាសិក្សាថ្មីមួយបែប STEM ដែលផ្ដោតការអប់រំផ្នែកបច្ចេកវិទ្យាផ្នែកវិទ្យាសាស្ដ្រវិស្វកម្ម និងគណិតវិទ្យាគ្រោងដាក់ដំណើរការសាកល្បងនៅសាលាបឋមសិក្សាព្រះនរោត្ដមសម្រាប់ឆ្នាំសិក្សាថ្មីខាងមុខ។
យោងតាមលោក គុយ ប៉ាន់ឆ័យ ហៅ ខេវីន ស្ថាបនិករ៉ូបូស៊ីងកម្ពុជាបានឲ្យដឹងថាកម្មវិធីបែបបច្ចេកវិទ្យាសាស្ត្ររបស់លោកបានជំរុញដល់ការអភិវឌ្ឍក៏ដូចជាការឆ្លើយតបចំពោះឧស្សាហកម្ម ៤.០ ដែលពិភពលោកកំណត់សម្គាល់ថាជាបដិវត្ដន៍លើការបញ្ជាមនុស្សយន្ដដោយស្វ័យប្រវត្ដិ ការបើកឡានដោយស្វ័យប្រវត្ដិ និងបច្ចេកវិទ្យាទំនើបៗដែលអភិវឌ្ឍចុងក្រោយបំផុតពាក់ព័ន្ធបច្ចេកវិទ្យា AI ការព្រីន 3D។
លោក ខេវីន បានរៀបរាប់អត្ថប្រយោជន៍ត្រួសៗសម្រាប់កុមារដែលបានចូលសិក្សាវគ្គដំឡើងរ៉ូបូតថា ពួកគេអាចផលិតយានយន្ដ រថក្រោះ សត្វមានចលនាដូចជា ពីងពាង ខ្លា ក្រពើ គ្រឿងចក្រពាក់ព័ន្ធសំណង់រួមមានដងសន្ទូចលើកវត្ថុធ្ងន់ៗឡើងលើអគារ ព្យ៉ាណូ ម៉ាស៊ីនចាប់តុក្កតា ដ្រូនហោះ យន្ដហោះ ឧទ្ធម្ភាគចក្រ អគារសួនសត្វដើមឈើផ្សេងៗ។
ជាមួយវត្ដមាន ១០ ប្រទេស និងជាង ៣០ មជ្ឈមណ្ឌលអប់រំទូទាំងពិភពលោក ដែលកម្ពុជាគឺជាប្រទេសទី ២ (បន្ទាប់ពីម៉ាឡេស៊ី) នៅអាស៊ីអាគ្នេយ៍ និងជាប្រទេស ៥ នៅតំបន់អាស៊ីប៉ាស៊ីហ្វិក RoboThink ដែលផ្ដោតសំខាន់សម្រាប់កុមារអាយុពី ៦ ដល់ ១៤ ឆ្នាំ ឬថ្នាក់ទី ១ ដល់ថ្នាក់ទី ៨ ជាកម្មវិធីសិក្សាបច្ចេកវិទ្យាលាយនឹងការកម្សាន្ត។
លោកស្រី Anna Sosanna Paulina van Zyl នាយិកាគ្រប់គ្រងទូទៅ RoboThink learning centre-Urban Space បាននិយាយថា៖ «ពួកគេប្រើប្រាស់ស្នាដៃផ្ទាល់ខ្លួនដើម្បីសង់គ្រឿងចក្រ ឬរ៉ូបូតដោយខ្លួនឯងហើយពួកគេមានចំណង់បង្កើតនូវអ្វីដែលខ្លួនចង់។ ពួកគេប្រាកដជាមានមោទនភាពចំពោះខ្លួនឯង។ វាក៏បានជួយពួកគេលើជំនាញទំនាក់ទំនង ការងារជាក្រុម និងអភិវឌ្ឍក្ដីស្រមៃផងដែរ។ ខ្ញុំគិតថា វាគឺជាកម្មវិធីដ៏អស្ចារ្យសម្រាប់កុមារ»។
លោកស្រី Anna Sosanna Paulina van Zyl និងលោក ខេវីន ស្ថាបនិកក្រុមហ៊ុននាំចូលកម្មវិធី RoboThink
ដោយសារកម្មវិធីសិក្សាផ្ដោតលើរ៉ូបូតនេះជាមុខវិជ្ជាថ្មីដែលដាក់ឲ្យដំណើរការទាំងក្នុងកម្មវិធីរបស់ក្រសួងផង និងមេរៀនក្រៅម៉ោងផង សិស្សានុសិស្សអាយុចាប់ពី ៦ ទៅ ១៤ ឆ្នាំត្រូវចាប់ផ្ដើមពីវគ្គដំបូងដូចគ្នា។
បើទោះបីជាសម្ភារ និងឧបករណ៍សិក្សាសម្រាប់ដំឡើងជារ៉ូបូតដូចជា គ្រឿងបន្លាស់ផ្សេងៗសុទ្ធតែមានស្រាប់ៗយ៉ាងណាក៏ដោយ ក៏ការផ្គុំសម្ភារទាំងនោះមិនងាយស្រួលប៉ុន្មានសម្រាប់កុមារតូចៗឡើយ។
គួរបញ្ជាក់ថាការបញ្ចូលក្នុងកម្មវិធីសិក្សានៅសាលារដ្ឋមុខវិជ្ជា RoboThink មានរយៈពេល ៨ ឆ្នាំសម្រាប់សិស្សានុសិស្សសិក្សារហូតដល់ចប់។ ចំពោះការសិក្សាក្រៅម៉ោង និងថ្នាក់បវេសនកាលការសិក្សាមានរយៈពេល ១៥៦ សប្ដាហ៍ ឬ ៣ ឆ្នាំកន្លះ។ វាមានតម្លៃសិក្សា ១៥០ ដុល្លារក្នុង ១ ត្រីមាសជាមួយការសិក្សា ១ សប្ដាហ៍រយៈពេល ១ ម៉ោងកន្លះ។
បើទោះបីជាសិស្សអនុវិទ្យាល័យរៀនថ្នាក់ទី ៨ វ័យ ១៦ ឆ្នាំទាំង ២ នាក់មានបំណងប្រាថ្នាអនាគតជាអ្នកជំនួញ និងអ្នកគ្រូពេទ្យយ៉ាងណាក៏ដោយ ក៏ពួកគេនៅតែផ្ដល់តម្លៃខ្ពស់ចំពោះបច្ចេកវិទ្យាឧស្សាហកម្ម ៤.០ ដែលពិភពលោកកំពុងតែបោះជំហានទៅមុខយ៉ាងលឿន៕
（យោងតាម postkhmer.com សរុបដោយវិច្ឆិកា）
មតិពីមិត្តអ្នកអាន