គណបក្សប្រជាជនកម្ពុជា នឹងប្រារព្ធខួបទី៦៨ នៃការបង្កើតគណបក្សនេះ នៅថ្ងៃព្រឹកថ្ងៃសុក្រ ទី ២៨ ខែ មិថុនា ដែលមានសមាជិកចូលរួម ៣ ម៉ឺននាក់។ ការប្រារព្ធខួបនេះធ្វើឡើងក្រោមអធិបតីភាពលោកនាយករដ្ឋមន្ត្រី ហ៊ុន សែន។ នេះបើតាមការបញ្ជាក់របស់លោក ឈឹម ផលវរុណ អ្នកនាំពាក្យគណបក្សប្រជាជនកម្ពុជា។
សម្តេចអគ្គមហាសេនាបតីតេជោហ៊ុន សែន និង សម្តេចអគ្គមហាពញាចក្រី ហេង សំរិន
លោក ផលវរុណ បានថ្លែងកាលពីម្សិលមិញថា គណបក្សប្រជាជនកម្ពុជា តែងទទួលស្គាល់ប្រវត្តិសាស្ត្រពិតគឺថា គណបក្សនេះ ត្រូវបានបង្កើតឡើងរួមជាមួយនឹងបក្សកុម្មុយនីស្តវៀតណាម និងគណបក្សប្រជាជនបដិវត្តន៍ឡាវ ដើម្បីប្រឆាំងនឹងអាណានិគមន៍បារាំង កាលពីឆ្នាំ ១៩៥១។
ប៉ុន្តែក្រោយពេលប្រទេសទាំង ៣ បានឯករាជ្យរៀងៗខ្លួន គណបក្សទាំង ៣ ត្រូវបានផ្ដាច់ពីគ្នា និងមានស្វ័យភាពរៀងៗខ្លួន។ លោកថ្លែងថា គណបក្សរបស់លោក ឆ្លងកាត់ព្យុះភ្លៀងជាច្រើន ប៉ុន្តែទទួលបានជោគជ័យរួមមានការចូលរួមរំដោះកម្ពុជា ពីអាណានិគមបារាំង ចក្រពត្តិអាមេរិក និងការផ្ដួលរំលំរបបខ្មែរក្រហម។
លោកថ្លែងថា៖ «គណបក្សប្រជាជនកម្ពុជា មិនដូចគណបក្សដទៃទេ គឺយើងមិនលាក់ការពិត គណបក្សដទៃគេលាក់ការពិត។ គណបក្សប្រជាជន មានឯកសារ និងទទួលស្គាល់ការពិត សូម្បីតែបណ្ដុះបណ្ដាលដល់មន្ត្រីបក្ស ក៏យើងនិយាយការពិតដែរ»។
លោកបន្តថា ក្រោយពេលរបបខ្មែរក្រហមដួលរលំ គណបក្សរបស់លោក បានរៀបចំរចនាសម្ព័ន្ធសាជាថ្មី ដែលមានលោក ជា ស៊ីម លោក ហេង សំរិន និងលោក ហ៊ុន សែន ជាថ្នាក់ដឹកនាំ។ លោកថា យុគសម័យថ្មីរបស់បក្សប្រជាជនកម្ពុជា គឺរាប់ចាប់ពីក្រោយរបបខ្មែរក្រហម តែបក្សនេះ មិនបោះបង់ប្រវត្តិចាស់ឡើយ។
លោកបន្តថា៖ «ភារកិច្ចរបស់គណបក្សប្រជាជនផ្សារភ្ជាប់ទៅនឹងភាពជាក់ស្ដែងនៃសង្គមជាតិ គឺសង្គមជាតិទសវត្សរ៍ទី ៥០,៦០ សង្គមជាតិកាលទសវត្សរ៍ ៧០, ៨០ សង្គមជាតិក្នុងទសវត្សរ៍ទី៩០ និងសង្គមជាតិសម័យអភិវឌ្ឍន៍យើងនេះគឺគណបក្សប្រជាជនកម្ពុជាបានវិវត្តខាងនយោបាយនិងទទួលខុសត្រូវក្នុងជោគវាសនាប្រទេសជាតិកាន់តែខ្ពស់ នៅក្នុងសង្គមកម្ពុជា»។
លោកបន្តថា បច្ចុប្បន្ននេះ គណបក្សរបស់លោកមានការទទួលខុសត្រូវកាន់តែខ្ពស់ លើជោគវាសនារបស់ជាតិ។
បើតាមលោក ផលវរុណ គណបក្សប្រជាជននឹងបន្តខិតខំបម្រើប្រជាពលរដ្ឋ ដើម្បីទទួលបានការទុកចិត្តពីពលរដ្ឋ ដោយការបោះឆ្នោតគាំទ្រពីអាណត្តិមួយទៅអាណត្តិមួយ។ «យើងមិនមែនខំដើម្បីបានអំណាចទេ គឺយើងខំដើម្បីកសាងប្រទេសក្នុងការទទួលខុសត្រូវ ប្រជាពលរដ្ឋនឹងឆ្លើយតបមកវិញ ដោយការផ្ដល់សេចក្តីទុកចិត្តមកលើយើង»។
កាលពីថ្ងៃចន្ទកន្លងទៅ លោក ឃួង ស្រេង អភិបាលរាជធានីភ្នំពេញ បានចេញសេចក្តីជូនដំណឹងមួយប្រាប់ដល់ពលរដ្ឋ ឲ្យបញ្ចៀសចរាចរណ៍ជាបណ្ដោះអាសន្ន ក្នុងពេលដែលគណបក្សប្រជាជនកម្ពុជា ប្រារព្ធខួបថ្ងៃកំណើតបក្សនៅកោះពេជ្រ។
លោក ឃួង ស្រេង ស្នើឲ្យពលរដ្ឋបញ្ចៀសជាបណ្ដោះអាសន្ន នូវការធ្វើចរាចរណ៍នៅកោះពេជ្រ ចាប់ពីម៉ោង ៦ ព្រឹក រហូតដល់ចប់កម្មវិធី។
លោកក៏បានសុំការយោគយល់ពីពលរដ្ឋ និងប្រាប់ដល់អាជ្ញាធរឲ្យផ្សព្វផ្សាយ និងអនុវត្តការណែនាំនេះ៕
(យោងតាម postkhmer សរុបដោយវិច្ឆិកា)
មតិពីមិត្តអ្នកអាន