យោងតាមការវាយតម្លៃលើបណ្តាញសង្គមហ្វេសប៊ុករបស់រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទលោក វេង សាខុនបានឱ្យដឹងថា ព្រៃវែងគឺជាខេត្តដែលផលិតនិងផ្គត់ផ្គង់ស្បៀងធំបំផុតជាងបណ្តារាជធានី-ខេត្តផ្សេងៗនៅកម្ពុជា
ខេត្តព្រៃវែងត្រូវបានវាយតម្លៃជាខេត្តដែលផលិតនិងផ្គត់ផ្គង់ស្បៀងធំបំផុតនៅកនុងប្រទេស។
ទិន្នន័យដែលរដ្ឋមន្ត្រីកសិកម្ម បង្ហាញ ព្រៃវែង ជាខេត្តដែលផលិតស្រូវបានខ្ពស់ជាងគេ ក្នុងចំណោមខេត្តទាំង៥ ដែលផលិតស្រូវបានច្រើនជាងនៅកម្ពុជា ដោយមានខេត្តបាត់ដំបង, តាកែវ, បន្ទាយមានជ័យ និងកំពង់ធំ។ សម្រាប់ឆ្នាំ២០១៩ ខេត្តព្រៃវែងផលិតស្រូវបានជាង ១,៣លានតោន ខណៈខេត្តបាត់ដំបងផលិតស្រូវជាង ១,២លានតោន, ខេត្តតាកែវផលិតស្រូវ១,២លានតោន, ខេត្តបន្ទាយមានជ័យផលិតស្រូវបានជិត៩៣ម៉ឺនតោន និងខេត្តកំពង់ធំផលិតស្រូវបាន៨៧ម៉ឺនតោន។
ខេត្តព្រៃវែង ក្រៅពីផលិតស្រូវបានច្រើនជាងគេហើយនោះ ក៏មានសមត្ថភាពនៃការចិញ្ចឹមសត្វផ្គត់ផ្គង់នៅលើទីផ្សារបានខ្ពស់ផងដែរ។ លោក វេង សាខុន បានបញ្ជាក់ថា ក្នុងឆ្នាំ២០២០នេះ ខេត្តព្រៃវែង មាន គោ ជាង៣៣,២ម៉ឺនក្បាល, ក្របីជាង១,៩ម៉ឺនក្បាល, មាន់មានជាង១,៨លានក្បាល និងទាមានជិត១,៩លានក្បាល ដែលអាចផលិតស៊ុត បានជាង១,៣លានគ្រាប់ ក្នុងមួយថ្ងៃ។
ខេត្តព្រៃវែងមានផ្ទៃដី ដាំដុះស្រូវប្រាំង៧,៥ម៉ឺនហិកតា, ដីស្រូវប្រាំងមាន២,៥ម៉ឺនហិកតា និងផ្ទៃដីដាំបន្លែ១,២ម៉ឺនហិកតា។ នេះបើតាមការលើកឡើងរបស់លោក អ៊ុក សំណាង ប្រធានមន្ទីរកសិកម្មខេត្តព្រៃវែង ដោយ បន្តថា ខេត្តព្រៃវែងក្រៅពីការផលិតស្រូវ និងចិញ្ចឹមសត្វ ខេត្តនេះ ក៏អាចផ្គត់ផ្គង់បន្លែសរីរាង្គ និងសុវត្ថិភាពនៅលើទីផ្សារនៅភ្នំពេញ បានជាង៣០តោន និងត្រីបានពី២០ទៅ៣០តោន ក្នុងមួយថ្ងៃផងដែរ៕
(សរុខដោយសាមេត)
មតិពីមិត្តអ្នកអាន