អំបិលត្រូវបានផលិតនៅក្នុងខេត្តកំពត និងខេត្តកែប ជាកន្លែងដែលទឹកសមុទ្រត្រូវបានបង្ហូរចូលក្នុងស្រែហាលធំៗ ហើយបង្ហូរបន្តទៅក្នុងវាលស្រែបណ្ដុះ។ នៅពេលដែលទឹកសមុទ្រហួតអស់ ក្រាមអំបិលស្ដើងៗបានដុះពាសពេញដីស្រែនោះ ហើយត្រូវបានកម្មករគៀងគរប្រមូលយកទៅទុកក្នុងឃ្លាំង។
ស្រែអំបិលក្នុងខេត្តកំពត។ (រូបថត៖ Thmey Thmey.com.khmer)
ខេត្តកំពតផលិតអំបិលបានសរុប ៨៣,៩៦៩តោន សម្រាប់ផ្គត់ផ្គង់តម្រូវការនានាប្រជាពលរដ្ឋនៅទូទាំងប្រទេស។ បរិមាណនៃផលអំបិលនេះ គឺជាកំណើន១០០ភាគរយ បើនឹងរយៈពេល២មុន(ឆ្នាំ២០១៨-ឆ្នាំ២០១៩) ដែលកម្ពុជាមិនអាចផលិតអំបិលបានព្រោះតែជួបគ្រោះធម្មជាតិ ដោយមានភ្លៀងធា្លក់រហូតនៅចំពេលប្រមូលផលអំបិល។ នេះបើយោងតាមរបាយការណ៍របស់ការិយាល័យស្រែអំបិលនៃមន្ទីរឧស្សាហកម្ម បច្ចេកទេស និងនវានុវត្តន៍ខេត្តកំពត។
ក្នុងរបាយការណ៍ដដែលបានបញ្ជាក់ថា ផលអំបិលទាំងជិត៨,៤ម៉ឺនតោននេះ គឺប្រមូលបានដោយប្រជាពលរដ្ឋជាអ្នកផលិតចំនួន១៦៩ក្រុម ក្នុងផ្ទៃដី៣,៧២៦ហិកតា។ លោក កឹង ស៊ុនធាង ប្រធានការិយាល័យស្រែអំបិលនៃមន្ទីរឧស្សាហកម្មកំពត បានអះអាងប្រាប់សារព័ត៌មានថ្មីៗ ថ្ងៃទី១០សីហា ថាអំបិលទាំងនោះ ត្រូវបានក្រុមអ្នកផលិតនាំគ្នាសម្រុកផលិតនិងប្រមូលផលបានជាបន្តបន្ទាប់ ចាប់ខែមករារហូតដល់ចុងខែកក្កដា។
«អំបិលឆ្នាំនេះ ផលិតបានច្រើនហើយថែមទាំងមានគុណភាព និងពណ៌សល្អទៀត»។ បើតាមលោក ស៊ុនធាង ក្នុងអំឡុងពេលផលិត និងប្រមូលផលអំបិល គឺមានអាកាសធាតុក្តៅរហូតដែលជាកត្តាអំណោយផលយ៉ាងចម្បងដល់ក្រុមអ្នកផលិតមានឱកាសផលិត និងប្រមូលអំបិលបានច្រើន។
ប្រធានការិយាល័យស្រែអំបិលនៃមន្ទីរឧស្សាហកម្មកំពតរូបនេះ បានបញ្ជាក់ថា អំបិលដែលប្រជាកសិករប្រមូលបានជិត៨,៤ម៉ឺនតោននេះ គឺមាន៤៤,៨២២តោន បានលក់និងចែកចាយនៅទូទៅប្រទេស និងមាននៅសល់ជាង៣,៩ម៉ឺនតោនទៀត មាននៅឃ្លាំង សម្រាប់ផ្គត់ផ្គង់តម្រូវការទីផ្សារបន្តបន្ទាប់។ លោកបានបន្ថែមថា អំបិលក្នុងមួយបាវដែលមានទម្ងន់៥០ មានតម្លៃពី៨,០០០ ទៅ១០,០០០រៀល។
សូមរំលឹកថា រយៈពេលប៉ុន្មានឆ្នាំចុងក្រោយនេះ កម្ពុជាបាននាំចេញអំបិលរបស់ខ្លួនទៅកាន់ទីផ្សារអន្តរជាតិជាបន្តបន្ទាប់។ នៅដើមឆ្នាំ ២០១៧ ខែកុម្ភៈ ក្រោមកិច្ចព្រមព្រៀងជាមួយក្រុមហ៊ុនបារាំងឈ្មោះ Le Guerandais កម្ពុជាបាននាំចេញអំបិលចំនួន ២០ តោនទៅកាន់ទីផ្សារបារាំង ដែលជាការនាំចេញលើកដំបូងបង្អស់ និងលក់បានក្នុងតម្លៃ ៥៨ ដុល្លារក្នុងមួយតោន។ យោងតាមមូលដ្ឋានទិន្នន័យរបស់ United Nations Comtrade Database អំបិលរបស់ប្រទេសកម្ពុជាបាននាំចេញទៅលក់ក្នុងទីផ្សាររបស់ប្រទេស ហូឡង់ ចំនួនប្រហែល ៩០០ តោន ដែលមានតម្លៃស្មើរនឹងទឹកប្រាក់ ៧៥០.០០០ ដុល្លារ នៅឆ្នាំ ២០១៦./.
（បូកសរុបដោយឌីណា）
មតិពីមិត្តអ្នកអាន