ក្រសួងពាណិជ្ជកម្មតាមរយៈគម្រោងជំរុញទីផ្សារសម្រាប់កសិកម្មខ្នាតតូច (អេមស៍-AIMS) បានចុះអនុស្សារណៈយោគយល់គ្នា ជាមួយក្រុមហ៊ុនម៉ាក្រូ (ខេមបូឌា) ស្តីពីការការអភិវឌ្ឍខ្សែច្រវ៉ាក់តម្លៃផលិតផលកសិ-ពាណិជ្ជកម្ម។
កសិករប្រមូលបន្លែនៅខេត្តមួយ
ការចុះអនុស្សារណៈយោគយល់គ្នាស្តីពីការអភិវឌ្ឍខ្សែច្រវ៉ាក់តម្លៃផលិតផលកសិ-ពាណិជ្ជកម្មត្រូវបានធ្វើឡើងដោយមានការអញ្ជើញចូលរួមពីឯកឧត្តម កឹម ស៊ីថន រដ្ឋលេខាធិការប្រចាំការនៃក្រសួងពាណិជ្ជកម្ម អគ្គនាយកក្រុមហ៊ុន Green Trade នាយកគ្រប់គ្រងទូទៅក្រុមហ៊ុនម៉ាក្រូ (ខេមបូឌា) អគ្គនាយកស្តីទីនៃអគ្គនាយកដ្ឋានពាណិជ្ជកម្មក្នុងប្រទេស និងប្រធានគម្រោងជំរុញទីផ្សារសម្រាប់កសិកម្មខ្នាតតូច (អេមស៍-AIMS)។
ឯកឧត្តម កឹម ស៊ីថន បានមានប្រសាសន៍ថាករណីនៃវីរុសកូវីដបានជះឥទ្ធិពលយ៉ាងធ្ងន់ធ្ងរដល់សេដ្ឋកិច្ច សង្គម និងជីវភាពរស់នៅរបស់ប្រជាជននៅជុំវិញពិភពលោកនិងប្រទេសកម្ពុជា។ ដើម្បីដោះស្រាយបញ្ហានេះ លោកថាប្រទេសកម្ពុជាបានចាត់វិធានការប្រកបដោយប្រសិទ្ធភាពខ្ពស់ស្របតាមអនុសាសន៍ដ៏ខ្ពង់ខ្ពស់របស់លោកនាយករដ្ឋមន្ត្រីដែលបានអំពាវនាវឱ្យប្រជាកសិករខិតខំធ្វើការដាំដុះ និងលើកកម្ពស់ផលិតកម្មកសិកម្មរួមមានការចិញ្ចឹមសត្វ ផលិតកម្មស្រូវ និងការដាំដុះដំណាំផ្សេងៗទៀតដើម្បីបង្កើនការផ្គត់ផ្គង់ដើម្បីឆ្លើយតបនឹងតម្រូវការក្នុងស្រុក ក៏ដូចជាទីផ្សារថ្មីសម្រាប់កសិករដែលជាកាលានុវត្តភាពប្រកបដោយសក្តានុពលសម្រាប់ផលិតកម្មកសិកម្ម ខណៈដែលគម្រោង AIMS បានដើរតួនាទីយ៉ាងសំខាន់។ លោកថាការចុះហត្ថលេខានេះមានគោលបំណងបង្កើតកិច្ចសហប្រតិបត្តិការដើម្បីលើកកម្ពស់ផលិតផលរបស់ប្រទេសកម្ពុជាតាមរយៈដៃគូនានា កំណត់ឱកាសសម្រាប់សកម្មភាព និងកម្មវិធីដែលផ្តល់ផលប្រយោជន៍ទៅវិញទៅមកដល់ភាគីទាំងពីរដើម្បីដោះស្រាយបញ្ហាប្រឈមនិងនិរន្តរភាពក្នុងបរិបទផលិតកម្មកសិ-ពាណិជ្ជកម្ម ផលិតផលកែច្នៃក្នុងស្រុក ផលិតផលរបស់សហគ្រាសខ្នាតតូចនិងមធ្យម និងដើម្បីដោះស្រាយបញ្ហាទីផ្សារ។
លោកបន្តថាការងារនេះគឺជាចំណុចចាប់ផ្តើមនៃកិច្ចសហប្រតិបត្តិការដ៏សំខាន់រវាងភាគីទាំងពីរ។ លោកបន្ថែមថា៖ «គម្រោងនេះនឹងពង្រីកវិសាលភាពនៃការអនុវត្តនិងផលិតផលសម្រេចរបស់សហគ្រាសធុនតូចនិងមធ្យមរបស់កម្ពុជាដទៃទៀតដើម្បីបង្កើតការងារ បង្កើនប្រាក់ចំណូលដល់ប្រជាជន ចូលរួមចំណែកក្នុងការអភិវឌ្ឍសហគ្រាសធុនតូចនិងមធ្យម ជាពិសេសជំរុញយុទ្ធនាការគាំទ្រផលិតផលក្នុងស្រុកស្របតាមគោលនយោបាយយុទ្ធសាស្ត្ររបស់រាជរដ្ឋាភិបាលកម្ពុជា»។
គួរបញ្ជាក់ឲ្យដឹងផងដែរថា គម្រោងជំរុញទីផ្សារសម្រាប់កសិកម្មខ្នាតតូច គឺជាគម្រោងរួមគ្នារបស់រាជរដ្ឋាភិបាលកម្ពុជា និងមូលនិធិអន្តរជាតិសម្រាប់អភិវឌ្ឍន៍កសិកម្ម (IFAD)។ គម្រោងនេះដឹកនាំប្រតិបត្តិដោយក្រសួងពាណិជ្ជកម្ម និងមានគោលដៅលើកស្ទួយ វិបុលភាពកសិករខ្នាតតូចកម្ពុជា តាមរយៈបង្កើនផលចំណេញកាន់តែច្រើនដោយតភ្ជាប់កសិ-ពាណិជ្ជកម្ម និងទីផ្សារ ដោយប្រតិបត្តិការនៅ ១៨ខេត្ត និងអន្តរាគមលើខ្សែច្រវ៉ាក់តម្លៃទំនិញពាណិជ្ជចំនួន៥ ដូចជា បន្លែ មាន់ស្រែ ស្រូវ ដំឡូងមី និងសូត្រឆៅ។
ជាមួយគ្នានេះផងដែរ ផ្សារម៉ាក្រូក្នុងខេត្តសៀមរាប បានទទួលទិញបន្លែសុវត្ថិភាពពីក្រុមកសិករផលិតរបស់គម្រោងអេមស៍ចំនួន ៤,៣២០គីឡូក្រាម និងបានទិញមាន់ស្រែចំនួន ១៥៦គីឡូក្រាម ខណៈដែលផ្សារម៉ាក្រូនៅភ្នំពេញ បានទទួលទិញបន្លែពីក្រុមកសិករផលិតនៅការិយាល័យមណ្ឌលភូមិភាគបូព៌ា និងឦសាន ពិសេសក្រុមកសិករផលិតនៅក្នុងខេត្តកំពង់ចាម៕
(ប្រភពព័ត៌មាន: Khmertimes)
មតិពីមិត្តអ្នកអាន