ក្រសួងពាណិជ្ជកម្មកម្ពុជា បានធ្វើការបដិសេធចំពោះការលើកឡើងរបស់មន្ត្រីអ្នកនាំពាក្យស្ថានទូតសហរដ្ឋអាមេរិកប្រចាំកម្ពុជាដែលថា ក្រុមហ៊ុនចិនមួយចំនួនដែលមានទីតាំងនៅខេត្តព្រះសីហនុ បានគំរាមកំហែងគយអាមេរិក ដោយក្រុមហ៊ុនទាំងនោះបានបញ្ជូនទំនិញទៅសហរដ្ឋអាមេរិក តាមរយះកម្ពុជាដើម្បីគេចពន្ធ។ក្រសួងពាណិជ្ជកម្ម ចាត់ទុកការលើកឡើងនេះ ពុំមានមូលដ្ឋានច្បាស់លាស់ឡើយ ដោយផ្ទុយពីការអនុវត្តជាក់ស្ដែង។
ក្រសួងពាណិជ្ជកម្មកម្ពុជាបដិសេធការលើកឡើងរបស់មន្ត្រីស្ថានទូតអាមេរិក
ប្រតិកម្មចំពោះការចោទប្រកាន់របស់អ្នកនាំពាក្យស្ថានទូតសហរដ្ឋអាមេរិកប្រចាំកម្ពុជា ទាក់ទងទៅនឹងចិនយកកម្ពុជាដើម្បីគេចពន្ធនោះ ក្រសួងពាណិជ្ជកម្មកម្ពុជា បានចេញសេចក្តីប្រកាសព័ត៌មានមួយដោយបដិសេធការចោទប្រកាន់នេះ និងថាជាការចោទពុំមានមូលដ្ឋានច្បាស់លាស់ ផ្ទុយពីការអនុវត្តជាក់ស្ដែង។
មន្ត្រីអ្នកនាំពាក្យស្ថានទូតអាមេរិកប្រចាំនៅកម្ពុជា បានអះអាងថា នាយកដ្ឋានសន្តិសុខអាមេរិកប្រចាំនៅកម្ពុជា បានត្រួតពិនិត្យរកឃើញ និង ពិន័យទៅលើក្រុមហ៊ុនចិនមួយចំនួនដែលមានទីតាំងនៅតំបន់សេដ្ឋកិច្ចពិសេសក្រុងព្រះសីហនុ ដែលបានគំរាមកំហែងគយរបស់អាមេរិក ដោយថាក្រុមហ៊ុនទាំងនោះបានបញ្ចូនទំនិញពីចិន មានដូចជាអាស៊ីតអាមីណូ ម្សៅអាហារធ្វើពីគ្រាប់ធញ្ញជាតិ (ពោត ស្រូវ ឬ ដំឡូង) និង បំពង់ដែកថែប។ល។ ទៅសហរដ្ឋអាមេរិក តាមរយៈប្រទេសកម្ពុជា ដើម្បីគេចពន្ធ ឬបង់ពន្ធក្នុងកម្រឹតលើកលែង។
ប៉ុន្តែតាមរយៈការស្រាវជ្រាវរបស់ខ្លួន ក្រសួងពាណិជ្ជកម្ម បានអះអាងថា ក្នុងតំបន់សេដ្ឋកិច្ចពិសេស ក្រុងព្រះសីហនុ មិនមានក្រុមហ៊ុនផលិតម្សៅអាហារធ្វើពីគ្រាប់ធញ្ញជាតិ និង បំពង់ដែកថែបទេ។ផលិតផលអាស៊ីដអាមីណូ កន្លងទៅក្រុមហ៊ុន Infinite Manufacturing Co, LTD. ដែលទទួលបានច្បាប់អនុញ្ញាតឲ្យវិនិយោគត្រឹមត្រូវពីក្រុមប្រឹក្សាអភិវឌ្ឍន៍កម្ពុជា (CDC) តាំងពីដើមខែ កុម្ភៈ ឆ្នាំ ២០១៥ បានធ្វើប្រតិបត្តិការផលិតកម្ម និងនាំចេញ រហូតដល់ខែសីហា ឆ្នាំ ២០១៧។ ប៉ុន្តែចាប់ពីខែកញ្ញា ឆ្នាំ ២០១៧ មកដល់ បច្ចុប្បន្ន ក្រុមហ៊ុនមួយនេះមិនមានដំណើរផលិតកម្ម និងនាំចេញទៀតឡើយ។
ក្រសួងពាណិជ្ជកម្ម បានបញ្ជាក់ផងដែរថា តំបន់សេដ្ឋកិច្ចពិសេសក្រុងព្រះសីហនុ គឺជាតំបន់សេដ្ឋកិច្ច និង ពាណិជ្ជកម្មពហុបំណង ដែលប្រមូលផ្ដុំទៅដោយសហគ្រាស ចិន កម្ពុជា អាមេរិក ជប៉ុន បារាំង កូរ៉េខាងត្បូង អៀរឡង់ វៀតណាម និង ថៃជាដើម។
សូមបញ្ជាក់ថា ផលិតផលទំនិញចម្រុះមានដូចជា វាយនភណ្ឌ សម្លៀកបំពាក់ កាបូប និង ផលិតផលស្បែក និង ឧបករណ៍ផ្សេងៗផងដែរ៕
（ប្រភព៖ kohsantepheapdaily និង freshnewsasia សរុបដោយវិច្ឆិកា）
មតិពីមិត្តអ្នកអាន