កម្មករ-កម្មការិនីប្រមាណជិត ២ ពាន់នាក់ មកពីរោងចក្រចំនួន ៥ នៅក្រុងបាវិតបានចូលរួមវគ្គបណ្តុះបណ្តាលជំនាញទន់ដែលរៀបចំដោយក្រសួងការងារស្តីពីជំនាញពាក់ព័ន្ធការងារមួយចំនួនដើម្បីបង្កើនផលិតភាព និងប្រសិទ្ធភាពការងារក្នុងការត្រៀមខ្លួនសម្រាប់ការងារថ្មីជាច្រើនទៀតនាពេលខាងមុខ។
កម្មករ-កម្មការិនីរោងចក្រពេលទទួលបានការបណ្ដុះបណ្ដាលចំណេះដឹង និងជំនាញនៅខេត្តកំពង់ស្ពឺកាលពីខែមិថុនា
លោក អ៊ូ សុខឿន ប្រធានមន្ទីរការងារ និងបណ្ដុះបណ្ដាលវិជ្ជាជីវៈខេត្តស្វាយរៀងថ្លែងពីម្សិលមិញថា ក្រសួងការងារបានរៀបចំវគ្គបណ្ដុះបណ្ដាលកម្មកររោងចក្រចំនួន ៥ ដែលបានព្យួរការងារស្ថិតនៅក្នុងតំបន់សេដ្ឋកិច្ចពិសេសក្រុងបាវិតដោយតំណាងក្រុមហ៊ុនបានបញ្ជូនកម្មករសរុបចំនួន ១ ៨៤៨ នាក់មកចូលរួមក្នុងវគ្គបណ្ដុះបណ្ដាលនេះ។លោកថា៖ "វគ្គបណ្តុះបណ្តាលជំនាញទន់ដល់កម្មករនិយោជិតនាពេលនេះ ដើម្បីបង្កើនផលិតភាព ប្រសិទ្ធភាពការងារមានទំនាក់ទំនងវិជ្ជាជីវៈនៅកន្លែងធ្វើការផង និងត្រៀមខ្លួនសម្រាប់ការងារថ្មីផង។ កាលដែលរៀននេះគឺពួកគាត់បំពេញលក្ខខណ្ឌតាមសេចក្ដីណែនាំលេខ ១៤ ព្រោះកម្មករទាល់តែបានទទួលការបណ្ដុះបណ្ដាលលើជំនាញទន់នេះទើបទទួលបានប្រាក់ឧបត្ថម្ភពីរដ្ឋាភិបាល"។
មន្ត្រីក្រសួងការងារម្នាក់ដែលសម្របសម្រួលវគ្គបណ្តុះបណ្តាលនេះថ្លែងសុំមិនបញ្ចេញឈ្មោះថា ក្រសួងការងារបានរៀបចំវគ្គបណ្ដុះបណ្ដាលរយៈពេល ២ ថ្ងៃចាប់ពីថ្ងៃទី ១១ និងថ្ងៃទី ១២ ខែកក្កដាដោយមានរោងចក្រសហគ្រាសចំនួន ៥ បានបញ្ជូនកម្មករសរុបជិត ២ ពាន់នាក់មកចូលរួមក្នុងវគ្គបណ្ដុះបណ្ដាលនេះ។
លោកថា គោលបំណងនៃការរៀបចំវគ្គបណ្តុះបណ្តាលជំនាញទន់ដល់កម្មករនិយោជិតនាពេលនេះ ដើម្បីបង្កើនផលិតភាព ប្រសិទ្ធភាពការងារ បង្កើនសុខដុមរមនា ទំនាក់ទំនងវិជ្ជាជីវៈនៅកន្លែងធ្វើការផង និងត្រៀមខ្លួនសម្រាប់ការងារថ្មីផង ខណៈឧស្សាហកម្មនឹងត្រឡប់មកជាប្រក្រតីវិញនានាពេលឆាប់ៗខាងមុខ។
លោកបញ្ជាក់ថា៖ «យើងបង្រៀនពាក់ព័ន្ធការងារដូចជា ជំនាញនៃការទំនាក់ទំនង និងសិល្បៈនៃការចរចា ការបំពេញការងារជាក្រុម មូលដ្ឋានច្បាប់ស្ដីពីការងារ នីតិវិធីដោះស្រាយវិវាទការងារ សិទ្ធិជាមូលដ្ឋានរបស់កម្មករនិយោជិត អត្ថប្រយោជន៍ ប.ស.ស និងសុវត្ថិភាព និងសុខភាពការងារ ជាពិសេសវិធានការបង្ការជំងឺកូវីដ ១៩»។
លោក វ៉ែន សាវាណ្និ សកម្មជនសហជីពចលនាកម្មករប្រចាំរោងចក្រយូលីនៅក្រុងបាវិតថ្លែងពីម្សិលមិញថា៖ «ខ្ញុំអត់ដឹងថា កម្មករយើង គាត់អាចយល់បានប៉ុន្មានភាគរយទេ ប៉ុន្ដែចំពោះខ្ញុំគឺល្អដែលក្រុមការងារក្រសួងគាត់មកបង្ហាត់បែបនេះ ព្រោះវាជាចំណេះដឹងដែលទាក់ទងការងារយើងច្រើន បើយើងបានយល់អ៊ីចឹងទៅ វាងាយស្រួលដល់ការគិត។ ជាក់ស្ដែងគឺមុននឹងយើងធ្វើកូដកម្ម ត្រូវគិតលើច្បាប់ ហើយបើមានគេរំលោភលើសិទ្ធិយើង យើងត្រូវគិតតវ៉ារបៀបណា? ខ្ញុំគិតថា ល្អច្រើន»។
លោក អែម សារ៉ាត់ កម្មករម្នាក់ក្នុងចំណោមកម្មករជិត ២ ពាន់នាក់ថ្លែងថា លោកបានទទួលចំណេះដឹង និងជំនាញច្រើនពីវគ្គបណ្ដុះបណ្ដាលនេះ ដោយបានអរគុណដល់រាជរដ្ឋាភិបាលក៏ដូចជាក្រសួងការងារដែលបានរៀបចំវគ្គបណ្តុះបណ្តាលនេះឡើងធ្វើឲ្យលោកទទួលបាននូវចំណេះដឹងបន្ថែមទៀតសម្រាប់យកទៅប្រើប្រាស់នៅក្នុងការងារ និងជីវភាពរស់នៅប្រចាំថ្ងៃ។ "ក្រោយពីបានចូលរួមក្នុងវគ្គបណ្តុះបណ្តាលនេះ ខ្ញុំពិតជារីករាយខ្លាំងណាស់ព្រោះបានធ្វើឲ្យខ្ញុំយល់ដឹងកាន់តែច្បាស់អំពីអត្ថប្រយោជន៍នៃការប្រើប្រាស់បណ្ណ ប.ស.ស ចេះបង្ការ និងការពារខ្លួនពីជំងឺកូវីដ និងធ្វើឲ្យខ្ញុំយល់ដឹងពីរបៀបនៃការចរចាធ្វើការងារជាក្រុម និងច្បាប់ស្តីពីការងារផងដែរ"៕
（ប្រភពព័ត៌មាន: postkhmer.com）
មតិពីមិត្តអ្នកអាន