ក្រសួងសារធារណការ និងដឹកជញ្ជូនបានប្រកាសបើកដំណើរការចុះបញ្ជីលេខពិសេសផ្ទាល់ខ្លួន សម្រាប់រថយន្ត ឬធ្វើស្លាកលេខរថយន្តពិសេសដែលអាចដាក់ជាឈ្មោះម្ចាស់យានយន្តបានចាប់ពីថ្ងៃទី ៧ ខែមករា ឆ្នាំ ២០២០ នេះទៅដើម្បីធ្វើទំនើបកម្មឲ្យមានភាពងាយស្រួលក្នុងការគ្រប់គ្រងនិងជាការចូលរួមកៀរគរថវិកាជាតិ។
កម្ពុជាបើកធ្វើស្លាកលេខពិសេស អាចដាក់ឈ្មោះម្ចាស់យានយន្តបាន។
អ្នកនាំពាក្យក្រសួងសាធារណៈការ និងដឹកជញ្ជួន លោក ហ៊ាង សុទ្ធាយុត្តិ ដែលជាអ្នកជំនាញក្នុងរៀបចំដាក់ឲ្យដំណើរការចុះបញ្ជីស្លាកលេខពិសេសផ្ទាល់ខ្លួននេះបានប្រាប់បណ្តាញព័ត៌មានក្នុងស្រុកនៅថ្ងៃនេះថា៖ ការដាក់ឲ្យដំណើរស្លាកលេខពិសេសនេះដើម្បីធ្វើទំនើបកម្មឲ្យមានភាពងាយស្រួលក្នុងការគ្រប់គ្រងនិងជាការបង្កើនការប្រមូលថវិកាជាតិផងដែរ។ សម្រាប់តម្លៃនៃស្លាកលេខពិសេសគឺមានចាប់ពី២លានរៀលឬស្មើនឹង៥០០ដុល្លារអាមេរិកឡើងទៅ។ ស្លាកលេខពិសេសនេះគឺម្ចាស់រថយន្តអាចបញ្ជាទិញដោយដាក់ឈ្មោះផ្ទាល់ខ្លួន ឬឈ្មោះពិសេសណាមួយសម្រាប់សំគាល់អត្តសញ្ញាណខ្លួនឯងហើយនៅពេលលក់រថយន្តឬប្តូរម្ចាស់កម្មសិទ្ធិ គឺអាចដកហូតស្លាកលេខនោះចេញដោយរក្សាទុកប្រើផ្ទាល់ខ្លួនអស់មួយជីវិត ។ នេះគឺជាការពន្យល់របស់លោក ហ៊ាង សុទ្ធាយុត្តិ ។
ប្រធាននាយកដ្ឋានព័ត៌មានវិទ្យានិងទំនាក់ទំនងសាធារណៈ លោក ហ៊ាង សុទ្ធាយុត្តិ បានពន្យល់ទៀតថាមូលហេតុដែលក្រសួងនឹកឃើញវិធីសាស្ត្រចេញស្លាក លេខពិសេសនេះ គឺដោយយោងលើការស្ទង់មតិដែលបង្ហាញថាពលរដ្ឋដែលមានជីវភាពធូធារ ឬអ្នកស៊ីវិល័យ ជាច្រើនចង់បានស្លាកលេខពិសេសនេះ។ ម្យ៉ាងទៀតរដ្ឋក៏អាចលក់ស្លាកលេខនេះបានថ្លៃដើម្បីប្រមូលចំណូលចូលរដ្ឋផងដែរ។
គួររំលឹកថាកាលពីខែមិថុនា ២០១៩ រាជរដ្ឋាភិបាលបានសម្រចចេញអនុក្រឹត្យមួយស្ដីពី «ការចុះបញ្ជីផ្ដល់បណ្ណសម្គាល់យានជំនិះ និងបំពាក់ស្លាកលេខសម្គាល់យានជំនិះ» ដែលមានចំនួន៨ ជំពូកនិង ៣៦ មាត្រាទៅតាមការស្នើរបស់ក្រសួងសាធារណការ និងដឹកជញ្ជូនខណៈក្នុងមាត្រា ២២ បានផ្ដល់សិទ្ធិដល់អ្នកដែលចង់ប្ដូរយានយន្ដថ្មីអាចសុំរក្សាស្លាកលេខចាស់របស់ខ្លួនបាន។ ត្រង់មាត្រា ២២ នៃជំពូកទី៣បានចែងថា «ម្ចាស់កម្មសិទ្ធិយានជំនិះមានសិទ្ធិស្នើសុំរក្សាលេខចុះបញ្ជីយានជំនិះ ដែលកំពុងប្រើប្រាស់សម្រាប់ចុះបញ្ជីលើយានជំនិះថ្មីរបស់ខ្លួនបានស្របតាមបែបបទ និងនីតិវិធីនៃការចុះបញ្ជីយានជំនិះ ការផ្តល់ស្លាកលេខសម្គាល់ យានជំនិះ និងការលុបចេញពីបញ្ជីយានជំនិះ និងត្រូវបង់កម្រៃសេវាសាធារណៈ ដែលកំណត់ដោយប្រកាសអន្តរក្រសួង រវាងរដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ និងរដ្ឋមន្ត្រីក្រសួងសាធារណការ និងដឹកជញ្ជូន»។នៅក្នុងអនុក្រឹត្យថ្មីនេះក៏បានបញ្ជាក់ពីការអនុញ្ញាតឲ្យម្ចាស់យានជំនិះអាចធ្វើស្លាកលេខពិសេស ទៅតាមការចង់បានរបស់ខ្លួន ។ ស្លាកលេខពិសេសនេះគឺម្ចាស់យានយន្តអាចកំណត់អក្សរឬលេខទៅតាមអ្វីដែលខ្លួនចង់បានហើយក៏អាចយកស្លាកលេខនេះ ទុកប្រើប្រាស់ពេញមួយជីវិតបានដែរ ។ អនុក្រឹត្យបានបញ្ជាក់ថា៖ «ស្លាកលេខយានយន្តពិសេសនេះត្រូវសរសេរអក្សរខ្មែរបញ្ជាក់ថា «កម្ពុជា» ពីខាងលើហើយផ្នែកកណ្តាលជាលេខចុះបញ្ជីមានលេខឬ/និងអក្សរឡាតាំងមិនលើសពី ៨ខ្ទង់និងផ្នែកខាងក្រោមសរសេរអក្សរឡាតាំង «CAMBODIA» នៅពីក្រោមបន្ទាត់ផ្តេក» ។
បើតាមលោក ហ៊ាង សុទ្ធាយុត្តិ នីតិវិធីថ្មីនេះក៏នឹងពង្រឹងការប្រមូលចំណូលជូនរដ្ឋអោយបានទ្វេដងនិងផ្តល់ជម្រើសរហូតដល់៦,៧ទ្រីលាន(លានលាន) ឯណោះក្នុងការជ្រើសរើសផ្លាកលេខរថយន្តដែលខ្លួនស្រឡាញ់ ។ លោកបន្ថែមថា ក្រោមការដឹកនាំ របស់ លោក ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូន ផ្លាកលេខពិសេសដែលកម្មង់ទិញពីរដ្ឋនេះ បើម្ចាស់ចង់លក់ទាំងផ្លាកលេខ ទៅជាមួយរថយន្ត គឺដូចតាមធម្មតាអ៊ីចឹង។ ម្ចាស់ផ្លាកលេខក៏អាចស្នើរក្សាលេខរថយន្តនេះទុកក៏បានដែរ ពេលលក់រថយន្តទៅអោយបុគ្គលផ្សេងមួយទៀត ។ លេខដែលរក្សាទុកនោះគឺទុកនៅមន្ទីរសាធារណការនិងដឹកជញ្ជូនអីចឹង ពេលម្ចាស់លេខនោះទិញរថយន្តថ្មីមួយទៀតអាចស្នើបំពាក់លើរថយន្តដែលទើបទិញនោះបានតាមនីតិវិធីដែលកំណត់ដោយប្រកាសក្រសួង។ ប៉ុន្ដែលេខរថយន្តហ្នឹងមិនអាចលក់ទៅឲ្យជនណាផ្សេងបានទេមានន័យថាកាល់លេខទៅឲ្យជនដទៃគឺវាអាចក្លាយជាអាជីវកម្មខុសច្បាប់» ។
លោកបានធ្វើការពន្យល់ថាអ្វីដែលលោក “ក” អាចលក់រថយន្តដែលមានភ្ជាប់ផ្លាកលេខនេះទៅតែម្តងឬលក់តែរថយន្តទៅឲ្យលោក “ខ”។ ហេតុនេះបើលោក “ក” លក់តែរថយន្តដោយរក្សាទុកលេខសម្រាប់រថយន្តលោក “ក” បន្ទាប់នោះលោក “ខ” ដែលទិញរថយន្តដែលមិនមានផ្លាកលេខត្រូវទិញផ្លាកលេខថ្មីបំពាក់លើរថ យន្តនោះជាកំហិតដើម្បីចុះបញ្ជីឲ្យស្របច្បាប់ដើម្បីធ្វើចរាចរណ៍លើផ្លូវបាន។ មានន័យថារថយន្តដែលធ្លាប់មានផ្លាកលេខហើយគឺមិនអាចគ្មានផ្លាកលេខវិញបាន នោះទេ។ សរុបមកទាំងលោក “ក” និងលោក “ខ” គ្មានសិទ្ធិលក់លេខរថយន្តទេប៉ុន្ដែគាត់មានសិទ្ធិទិញលេខរថយន្តពីរដ្ឋ«ឧទាហរណ៍ថាខ្ញុំមានរថយន្តមួយដែលមានអក្ស ៤ តួរថា “YUTH”ស្រាប់តែខ្ញុំលក់ឡានទៅឲ្យបុគ្គលមួយទៀតគឺខ្ញុំមានសិទ្ធិលក់ទាំងផ្លាកលេខភ្ជាប់ជាមួយឡានឬលក់តែឡានរក្សាទុកផ្លាកលេខក៏បាន ដែរ។ បើខ្ញុំទិញថ្មីមួយទៀតខ្ញុំនឹងទៅធ្វើនីតិវិធីជាមួយរដ្ឋបំពាក់ផ្លាកលេខចាស់ហ្នឹងទៅលើឡានថ្មីនេះតែម្ដងដោយទទួលស្គាល់ដោយច្បាប់និងសមត្ថកិច្ច។ករណី ពិសេសមួយទៀតគឺម្ចាស់ឡានអាចប្ដូរឈ្មោះពីមួយទៅមួយទៀតបានបើសិនចង់ប្ដូរដែលត្រូវធ្វើតាមអនុលោមភាពនៃច្បាប់អនុក្រឹត្យ និង ប្រកាសដែលបាន និងកំពុងរៀបចំជាបន្តបន្ទាប់» ។ លោកបញ្ជាក់ថាការលក់ទៅឲ្យបុគ្គលណាមួយគឺត្រូវផ្ទេរកម្មសិទ្ធិហើយការផ្ទេរនេះនឹងត្រូវធ្វើការជាមួយក្រសួងសារធារណការនិងដឹកជញ្ជូន ព្រមជាមួយការបង់ពន្ធជូនរដ្ឋជាមួយនីតិវិធីដែលនិងត្រូវធ្វើនៅមួយកន្លែងនិងមិនពិបាកស្មុគស្មាញទៀតឡើយ ៕
(សរុបដោយវិច្ឆិកា)
មតិពីមិត្តអ្នកអាន