ការប្រកួតកីឡាប្រជាជាតិអាស៊ីអាគ្នេយ៍ ដែលហៅកាត់ថាស៊ីហ្គេម (មកពីពាក្យអង់គ្លេស Southeast Asian Games ឬ SEA Games) គឺជាព្រឹត្តិការណ៍កីឡាពហុជាតិសាសន៍នៃបណ្ដាប្រទេសនៅអាស៊ីអាគ្នេយ៍ទាំង១១។ ស៊ីហ្គេមត្រូវគេប្រារព្ឋធ្វើឡើងរៀងរាល់២ឆ្នាំម្ដង ដោយប្រទេសជាសមាជិកផ្លាស់ប្ដូរវេនគ្នាធ្វើជាម្ចាស់ផ្ទះ។ ព្រឹត្តិការណ៍នេះរៀបចំឡើងដោយ សហព័ន្ឋកីឡាប្រជាជាតិអាស៊ីអាគ្នេយ៍ (Southeast Asian Games Federation) ក្រោមការត្រួតពិនិត្យពី គណកម្មការអូឡាំពិកអន្តរជាតិ (International Olympic Committee ហៅកាត់ថា IOC ) និង ក្រុមប្រឹក្សាអូឡាំពិកអាស៊ី (Olympic Council of Asia)។
CASOC រៀបចំកិច្ចប្រជុំ ដើម្បីពិភាក្សាលើការសាងសង់ហេដ្ឋារចនាសម្ព័ន្ធ និងត្រួតពិនិត្យវឌ្ឍនភាពការងារនិងដាក់ចេញផែនការឆ្ពោះទៅស៊ីហ្គេមឆ្នាំ២០២៣។ (រូបភាពពី CAMSOC)
សាលារាជធានីភ្នំពេញ គ្រោងសាងសង់ផ្លូវចំនួនពីរខ្សែបន្ថែម ដើម្បីជួយសម្រួលចរាចរណ៍របស់រថយន្តដឹកប្រតិភូ និងក្រុមកីឡាករមកពីប្រទេសផ្សេងៗ ពេលកម្ពុជាធ្វើជាម្ចាស់ផ្ទះកីឡាស៊ីហ្គេមឆ្នាំ២០២៣។ ផ្លូវទាំងពីរខ្សែនេះ ក៏នឹងរួមចំណែកកាត់បន្ថយការកកស្ទះចរាចរណ៍ លើផ្លូវជាតិលេខ៦អា ក្នុងតំបន់រាជធានីភ្នំពេញផងដែរ។
គណៈកម្មាធិការជាតិរៀបចំការប្រកួតកីឡាស៊ីហ្គេមឆ្នាំ២០២៣ (CAMSOC) នៅថ្ងៃទី១៩ ខែឧសភា ឆ្នាំ២០២០ បានរៀបចំកិច្ចប្រជុំមួយ ដើម្បីពិនិត្យវឌ្ឍនភាព និងពន្លឿនការងារគណៈកម្មការជំនាញ របស់ CAMSOC ស្របពេលដែលព្រឹត្តិការណ៍នេះនឹងចូលមកឆាប់ៗ។ ក្នុងកិច្ចប្រជុំនេះ CAMSOC បានពិភាក្សាគ្នា លើរបៀបវារៈចំនួនពីរ ពាក់ព័ន្ធការបង្ហាញទិសដៅការងារ និងតួនាទីភារកិច្ច របស់គណៈកម្មការជំនាញចំនួន៦ ក្នុងចំណោមគណៈកម្មការទាំង១៤ និងការកសាងហេដ្ឋារចនាសម្ព័ន្ធតភ្ជាប់ ទៅពហុកីឡដ្ឋានជាតិមរតកតេជោ។
ពាក់ព័ន្ធនឹងហេដ្ឋារចនាសម្ព័ន្ធ លោក ហួត ហៃ អភិបាលរងរាជធានីភ្នំពេញ បានបញ្ជាក់ថា រដ្ឋបាលរាជធានីភ្នំពេញ នឹងសាងសង់ផ្លូវចំនួនពីរខ្សែចេញពីរាជធានីភ្នំពេញ ត្រង់ម្តុំស្ពានជ្រោយចង្វារ ឆ្ពោះទៅពហុកីឡដ្ឋានជាតិមរតកតេជោ ដើម្បីសម្រួល និងបញ្ចៀសការកកស្ទះចរាចរណ៍ របស់រថយន្តដឹកប្រតិភូ និងក្រុមកីឡាករមកពីប្រទេសក្នុងតំបន់។ បើតាម លោក ហួត ហៃ ផ្លូវទាំងពីរខ្សែនេះ ក៏នឹងជួយកាត់បន្ថយការកកស្ទះ លើផ្លូវជាតិលេខ៦អា និងក្នុងក្រុងភ្នំពេញដែរ។
លោកបានបន្ថែមទៀតថា ផ្លូវខ្សែទី១ សាងសង់ភ្ជាប់ពីផ្លូវ OCIC ឆ្ពោះទៅវិមានឈ្នះ-ឈ្នះ និងខ្សែទី២ ចេញពីស្ពានជ្រោយចង្វារ ស្របតាមដងទន្លេសាប ឆ្ពោះទៅស្ពានលីយ៉ុងផាត់ បត់មក ពហុកីឡដ្ឋានជាតិមរតកតេជោ។ ផ្លូវទាំងពីរខ្សែនេះ នឹងបញ្ចប់ការសាងសង់ជាស្ថាពរ នៅក្នុងឆ្នាំ២០២២។ នេះបើតាមលោក ហួត ហៃ។
ក្នុងកិច្ចប្រជុំនោះដែរ លោក ថោង ខុន អនុប្រធានអចិន្ត្រៃយ៍ នៃCAMSOC បានជំរុញឲ្យគណៈកម្មការជំនាញទាំង៦ បង្កើនការយកចិត្តទុកដាក់ និងរៀបចំផែនការអនុវត្តឲ្យបានច្បាស់លាស់ និងត្រួតពិនិត្យលទ្ធផលការងារដែលខ្លួនបានដាក់ចេញ។ ការជំរុញនេះ គឺដើម្បីធានាថា កម្ពុជាត្រៀមរួចរាល់១០០ភាគរយ ក្នុងការធ្វើជាម្ចាស់ផ្ទះកីឡាស៊ីហ្គេមឆ្នាំ២០២៣ ដោយជោគជ័យ និងកត់ត្រាជាប្រវត្តិសាស្ត្រ លើការរៀបចំរបស់ខ្លួន៕
（បូកសរុបដោយឌីណា）
មតិពីមិត្តអ្នកអាន