សម្ដេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃបានមានប្រសាន៍ថា កិច្ចការពារពលករទេសន្តប្រវេសន៍គឺជាកិច្ចការដ៏ចាំបាច់ដែលគប្បីត្រូវយកចិត្តទុកដាក់ឲ្យបានខ្លាំងក្លាពីប្រទេសដើមនិងប្រទេសគោលដៅ។ខណៈកម្ពុជាកំពុងមានពលករទេសន្តប្រវេសន៍ជាង១០ម៉ឺននាក់។
សម្ដេច ស ខេង ក្នុងកម្មវិធីសិក្ខាសាលាពិគ្រោះយោបល់ថ្នាក់ជាតិលេីកទី២ កម្រិតថ្នាក់ដឹកនាំ ស្ដីពីកតិកាសញ្ញាពិភពលោកសម្រាប់ទេសន្ដរប្រវេសន៍ដោយសុវត្ថិភាព រៀបរយ និងស្របច្បាប់(GCM)។ (រូបពីទំព័រហ្វេសប៊ុករបស់សម្ដេច ស ខេង)
សម្តេចក្រឡាហោម ស ខេង បានមានប្រសាសន៍ឲ្យដឹងថា៖ ចាប់២១ មីនា រហូតមកដល់២៣កក្កដា២០២០ កម្ពុជាមានពលករដែលធ្វើទេសន្តប្រវេសន៍ប្រមាណ ១០៣.០០០ នាក់ ក្នុងនោះជាស្ត្រី៤៥ ។ រាជរដ្ឋាភិបាលបាននិងកំពុងទទួលសង្គ្រោះពលករដែលវិលត្រឡប់មកវិញដោយព្យាយាមឆ្លងដែនខុសច្បាប់និងតាមច្រក មិនផ្លូវការគេចវេះពីស្ថានភាពលំបាកក្នុងប្រទេសគោលដៅក្នុងអំឡុងពេលដែលប្រទេសគោលដៅកំពុងរឹតបន្តឹង ឬបិទប្រទេសដើម្បីកាត់បន្ថយការឆ្លងនូវជំងឺកូវីដ ១៩ ។
សម្តេចក្រឡាហោមបានបន្តថា៖ «ស្ថានភាពបែបនេះនឹងមិនអាចបញ្ចប់ដោយឆាប់បាននោះទេ ហើយក៏អាចអូសបន្លាយបន្តទៀតក្នុងរយៈពេលវែង ហេតុនេះកិច្ចការពារពលករទេសន្តប្រវេសន៍គឺជាកិច្ចការដ៏ចាំបាច់ដែលគប្បីត្រូវយកចិត្តទុកដាក់ឲ្យបានខ្លាំងក្លាពីប្រទេសដើមនិងប្រទេសគោលដៅ»។
ក្នុងសិក្ខាសាលាពិគ្រោះយោបល់ថ្នាក់ជាតិលើកទី២ ស្ដីពីកតិកាសញ្ញាពិភពលោកសម្រាប់ទេសអន្ដរប្រវេសន៍ដោយសុវត្ថិភាព រៀបរយ និងស្របច្បាប់នៅថ្ងៃទី៣០កក្កដា សម្ដេច ស ខេង បានដាក់ផែនការសកម្មភាព៤ចំណុច ដើម្បីដោះស្រាយបញ្ហាប្រឈមពាក់ព័ន្ធនឹងទេសអន្តរប្រវេសន៍ គឺការការពារជនទេសអន្តរប្រវេសន៍, ការគ្រប់គ្រងទិន្នន័យ, ការគាំទ្រដំណើរការវិញត្រឡប់និងធ្វើសមាហរកម្មជនទេសអន្តរប្រវេសន៍ និងការកំណត់ និងផ្ដល់អត្តសញ្ញាណស្របច្បាប់ ពិសេសកូនទេសអន្តរប្រវេសន៍។
សម្ដេចបានបន្ថែមថា ជនទេសអន្តរប្រវេសន៍ដែលខ្វះកិច្ចការពារពីប្រព័ន្ធច្បាប់ តែងត្រូវបានជនឆ្លៀតឱកាសកេងប្រវ័ញ្ចយកផលចំណេញ ដោយធ្វើការជួញដូរមនុស្ស រំលោភបំពាន កេងប្រវ័ញ្ចកម្លាំងពលកម្មធ្ងន់ធ្ងរ។ ការរំលោភបំពានបែបនេះ បង្កើតឲ្យមានទាសភាព ធ្វើឲ្យធ្លាក់ខ្លួនជរា ពិការ វង្វេងស្មារតី បាត់បង់ភាពជាមនុស្សឬរហូតដល់បាត់បង់ជីវិតផងដែរ។ សម្ដេច សង្កត់ធ្ងន់ថា ការធ្វើទេសអន្តរប្រវេសន៍នៅអំឡុងពេលកូវីដ-១៩នេះ ប្រឈមបញ្ហាខ្លាំង ខណៈបណ្ដាប្រទេសនានាបានរឹតបន្តឹងការចេញចូល។
គិតចាប់ពីថ្ងៃទី២១មីនា ដល់ថ្ងៃទី២៣កក្កដា ពលករកម្ពុជាដែលវិលត្រឡប់ពីការធ្វើទេសអន្តរប្រវេសន៍ ក្នុងអំឡុងកូវីដ-១៩ មានជាង១០ម៉ឺននាក់ ក្នុងនោះមានស្ត្រី៤៥ភាគរយ។ នេះបើតាមរបាយការណ៍ក្រសួងមហាផ្ទៃ៕
（បូកសរុបដោយឌីណា）
មតិពីមិត្តអ្នកអាន