ក្រសួងអប់រំយុវជនកីឡាកម្ពុជា កំពុងបន្តកិច្ចសហការជាមួយអង្គការ UNESCO ក្នុងការបណ្តុះបណ្តាលសមត្ថភាពបន្ថែមដល់គ្រូបង្រៀន និងមន្ត្រីអប់រំ តាមរយៈកម្មវិធី STEPCam ដើម្បីកែលម្អគុណភាពបង្រៀន និងរៀន ដែលកម្មវិធីនេះនឹងជួយផ្តល់ការអប់រំដោយផ្ទាល់ដល់កុមារប្រមាណ ១៣ ម៉ឺននាក់ ជាពិសេសកុមារដែលងាយរងគ្រោះ។
UNESCO ជួយកម្ពុជាកែលម្អគុណភាពបង្រៀន និងរៀនតាមរយៈកម្មវិធី STEPCam
សេចក្តីប្រកាសព័ត៌មាន របស់អង្គការ UNESCO កាលពីថ្ងៃអង្គារបានឲ្យដឹងថា កម្មវិធីនេះផ្តោតលើការយកចិត្តទុកដាក់ចំពោះតួនាទីរបស់គ្រូបង្រៀន ដោយត្រូវធ្វើការបណ្តុះបណ្តាលបន្ថែមដល់គ្រូបង្រៀនជាង ៤ ០០០ នាក់ និងមន្រ្តីអប់រំជាង ៣ ០០០ នាក់ ដើម្បីឈានទៅបណ្តុះបណ្តាលកសាងមូលដ្ឋានគ្រឹះនៅថ្នាក់ដំបូងរបស់កុមារ។
កម្មវិធីដែលមានរយៈពេល ៣ ឆ្នាំ ពីឆ្នាំ ២០១៨ ដល់ ២០២០ នេះត្រូវបានបង្កើតឡើងដោយក្រសួងអប់រំ និងអង្គការ UNESCO ហើយរហូតមកដល់ពេលនេះត្រូវបានអនុវត្តបាន ១ ឆ្នាំហើយ។
កម្មវិធីនេះត្រូវបានផ្តល់ថវិកាដោយភាពជាដៃគូសកលសម្រាប់ការអប់រំ (GPE) និងមូលនិធិកសាងសមត្ថភាពអប់រំ របស់អង្គការ UNESCO ដើម្បីគាំទ្រដល់ក្រសួងអប់រំក្នុងការកែលម្អគុណភាពបង្រៀន និងរៀននៅថ្នាក់ដំបូង ដូចជាការអភិវឌ្ឍវិជ្ជាជីវៈជាប្រចាំវគ្គវិក្រឹតការ ការគាំទ្របច្ចេកទេស ការកែលម្អរចនាសម្ព័ន្ធសាលាគរុកោសល្យ និងវិក្រឹតការខេត្ត និងសមត្ថភាពគ្រូឧទ្ទេស។
សេចក្តីប្រកាសព័ត៌មានបន្តថា៖ «ការពង្រឹងកម្មវិធីអប់រំគ្រូបង្រៀននៅកម្ពុជាគឺកំពុងអភិវឌ្ឍសមត្ថភាពគ្រូ និងអគារសិក្សា ឱ្យកាន់តែល្អប្រសើរ ដើម្បីធានាឱ្យបាននូវគុណភាពកាន់តែប្រសើរ និងឱកាសសិក្សាប្រកបដោយបរិយាប័ន្នសម្រាប់កុមារ»។
សាលាគរុកោសល្យចំនួន ១១ កន្លែង នឹងត្រូវជួសជុល ហើយវិធីសាស្ត្របង្រៀនថ្មីៗត្រូវបានអនុវត្តនៅខេត្តចំនួន ៥ ក្នុងនោះមានខេត្តក្រចេះ ព្រះវិហារ សៀមរាប ស្ទឹងត្រែង និងឧត្តរមានជ័យ ដែលត្រូវបានជ្រើសរើសដោយផ្អែកទៅលើតម្រូវការខ្ពស់ និងគម្លាតការអប់រំថ្នាក់ដំបូង។ នៅឆ្នាំ ២០២០ កម្មវិធីនឹងពង្រីកវិសាលភាពទៅកាន់ខេត្តផ្សេងៗទៀត។
អ្នកជំនាញផ្នែកទំនាក់ទំនងនៃអង្គការ UNESCO មិនអាចទាក់ទងសុំអធិប្បាយបានទេ។ ប៉ុន្តែ លោក រស់ សុវាចា អ្នកនាំពាក្យក្រសួងអប់រំ ថ្លែងកាលពីម្សិលមិញថា STEPCam ក្នុងឆ្នាំទី១ បានបំប៉នគ្រូថ្នាក់ទី ១ លើផ្នែកអំណានភាសាខ្មែរ បានចំនួន ៨៤៧ រូប និងផ្នែកគណិតវិទ្យា បានចំនួន ១៤៧ រូប។ គ្រូបង្រៀនទាំងអស់បានបង្រៀនសិស្សចំនួន ៣២ ២៣៦ រូប។
លោកបញ្ជាក់ថា៖ «(STEPCam ) លើកកម្ពស់គុណវុឌ្ឍិគ្រូឧទ្ទេស ឱ្យស្មើកម្រិតបរិញ្ញាបត្រ ជាពិសេសដល់អ្នកដែលមិនមានសញ្ញាបត្របរិញ្ញាបត្រ ឬកម្រិតបរិញ្ញាបត្រដែលមិនពាក់ព័ន្ធនឹងមុខវិជ្ជាឯកទេសរបស់ខ្លួនដើម្បីជួយឱ្យពួកគេផ្តល់នូវវគ្គវិក្រឹតការដល់គ្រូបឋមសិក្សាកាន់តែមានប្រសិទ្ធភាព»។
លោក សុវាចា បន្តថា ក្នុងការអនុវត្តកម្មវិធីនេះ STEPCam ផលិតសម្ភារបង្រៀន និងរៀន ដែលមានលក្ខណៈកុមារមេត្រី។ សម្រាប់ផ្នែកភាសាខែ្មរ ផលិតសៀវភៅណែនាំគ្រូ និងសៀវភៅជំនួយភាសាខែ្មរសម្រាប់សិស្សហាត់អាន និងសរសេរ។ សម្រាប់ផ្នែកគណិត STEPCam ផលិតសៀវភៅណែនាំគ្រូសម្ភារឧបទ្ទេសសម្រាប់រៀន និងបង្រៀន និងសៀវភៅលំហាត់សម្រាប់សិស្ស។
បើតាមក្រសួងអប់រំ មូលនិធិភាពជាដៃគូអប់រំសកលទី ៣ មានទឹកប្រាក់ ២០,៦ លានដុល្លារ ផ្តោតលើការអភិវឌ្ឍសមត្ថភាព និងកម្មវិធីអប់រំគ្រូបង្រៀន។
សេចក្ដីប្រកាសព័ត៌មានរបស់ UNESCO បានបន្តថា ចំណុចស្នូលនៃកម្មវិធីនេះ គឺការធ្វើវិក្រឹតការអភិវឌ្ឍវិជ្ជាជីវៈគ្រូបង្រៀនថ្នាក់ដំបូងនៅក្នុងគ្រឹះស្ថានបណ្តុះបណ្តាល ដែលជាសកម្មភាពអភិវឌ្ឍសមត្ថភាពមួយឆ្ពោះទៅរកការអភិវឌ្ឍសម្ភារបង្រៀនមានលក្ខណៈកុមារមេត្រី និងមានការចូលរួមប្រើប្រាស់គោលវិធីសិស្សមជ្ឈមណ្ឌលជំរុញការរិះរកបែបវិជ្ជមាន និងការចូលរួមបែបសកម្ម។
សេចក្តីប្រកាសព័ត៌មាន បន្ថែមទៀតថា កម្មវិធីនេះ គឺពង្រឹងកម្មវិធីអប់រំគ្រូបង្រៀននៅកម្ពុជា លើកកម្ពស់សារៈសំខាន់នៃការកសាងមូលដ្ឋានគ្រឹះផ្នែកអំណាន និងគណិតវិទ្យា នៅឆ្នាំដំបូង និងតួនាទីសំខាន់ របស់គ្រូបង្រៀននៅក្នុងដំណើរការនេះ។
អង្គការយូណេស្កូប្រចាំនៅកម្ពុជា គឺជាភ្នាក់ងារគ្រប់គ្រងមូលនិធិផ្នែកថេរ និងជាដៃគូដ៏សំខាន់ របស់ក្រសួង អប់រំ យុវជន និងកីឡា។ ការពង្រឹងកម្មវិធីអប់រំគ្រូបង្រៀននៅកម្ពុជា គឺជាការផ្តល់មូលនិធិដំណាក់កាលទី ៣ របស់ភាពជាដៃគូសកលសម្រាប់ការអប់រំនៅប្រទេសកម្ពុជាចាប់តាំងពីឆ្នាំ ២០០៨ មក។ នេះបើតាមសេចក្តីប្រកាសព័ត៌មាន៕
（យោងតាម postkhmer សរុបដោយវិច្ឆិកា）
មតិពីមិត្តអ្នកអាន