យុគសម័យ - ទោះបីជាកម្ពុជាសម្រេចបានកំណើនសេដ្ឋកិច្ចគួរឱ្យកត់សម្គាល់ក្នុងរយៈពេលប៉ុន្មានឆ្នាំកន្លងមកក៏ដោយ ប៉ុន្តែការផ្តល់អាទិភាពលើវិស័យកសិកម្ម ដែលបន្តដើរតួនាទីយ៉ាងសំខាន់ក្នុងការជម្រុញកំណើនសេដ្ឋកិច្ច និងកាត់បន្ថយភាពក្រីក្រ ហាក់ដូចជានៅមានកម្រិត បើធៀបទៅនឹងវិស័យទេសចរណ៍ និងឧស្សាហកម្មកាត់ដេរ។
ធនាគារអភិវឌ្ឍន៍អាស៊ីបន្តជម្រុញការអភិវឌ្ឍវិស័យកសិកម្មដែលនៅមានកម្រិតទាប
វិស័យកសិកម្មកម្ពុជា បានបង្ហាញពីការធ្លាក់ចុះជាបន្តបន្ទាប់ ដោយកាលពីឆ្នាំ ២០១៤ ចំណែកវិស័យកសិកម្មក្នុង GDP មាន ៣០ ភាគរយ ប៉ុន្តែបច្ចុប្បន្នបានធ្លាក់មកនៅត្រឹមតែ ២២-២៣ ភាគរយ។ ទោះបីជាកម្ពុជាសម្រេចបានកំណើនសេដ្ឋកិច្ចគួរឱ្យកត់សម្គាល់ក្នុងរយៈពេលប៉ុន្មានឆ្នាំកន្លងមកក៏ដោយប៉ុន្តែការផ្តល់អាទិភាពលើវិស័យកសិកម្ម ដែលបន្តដើរតួនាទីយ៉ាងសំខាន់ក្នុងការជម្រុញកំណើនសេដ្ឋកិច្ច និងកាត់បន្ថយភាពក្រីក្រ ហាក់ដូចជានៅមានកម្រិត បើធៀបទៅនឹងវិស័យទេសចរណ៍ និងឧស្សាហកម្មកាត់ដេរ។
លោក Andrew Brubaker ប្រធានក្រុមវាយតម្លៃរបស់ ADB
យោងតាមការវាយតម្លៃមួយនាពេលថ្មីៗនេះដែលធ្វើឡើងដោយនាយកដ្ឋានវាយតម្លៃឯករាជ្យរបស់ធនាគារអភិវឌ្ឍន៍អាស៊ី (ADB) បានឱ្យដឹងថា ADB នឹងត្រូវធ្វើការវិវឌ្ឍន៍និងពង្រីកកិច្ចគាំទ្ររបស់ខ្លួន ចំពោះវិស័យកសិកម្មក្នុងប្រទេសកម្ពុជាដើម្បីជួយគាំទ្រដល់កំណើនសេដ្ឋកិច្ចរបស់ប្រទេសនេះកាត់បន្ថយផលប៉ះពាល់នៃការប្រែប្រួលអាកាសធាតុនិងទាក់ទាញឱ្យមានការចូលរួមកាន់តែច្រើនពីវិស័យឯកជនដើម្បីបំពេញតម្រូវការរបស់ប្រជាជនដែលកំពុងមានចំនួនកើនឡើងនៅតំបន់ទីក្រុង។ ការចេញផ្សាយនៃការវាយតម្លៃឯករាជ្យរបស់ធនាគារអភិវឌ្ឍន៍អាស៊ី (ADB) នៅរាជធានីភ្នំពេញ។
លោក Andrew Brubaker ប្រធានក្រុមវាយតម្លៃរបស់ ADB បានមានប្រសាសន៍ឱ្យដឹងថា «នៅក្នុងកិច្ចខិតខំក្នុងការជម្រុញការចូលរួមរបស់យើងនៅក្នុងវិស័យកសិកម្ម គេចាំបាច់ត្រូវស្វែងរកមេរៀននានា និង រៀនសូត្រពីបទពិសោធន៍របស់គម្រោងដែលបានអនុវត្តនាពេលកន្លងមក។ មេរៀនមួយ ដែលបានធ្វើឱ្យសមិទ្ធិកម្មមានភាពរីកចម្រើនគួរឱ្យកត់សម្គាល់ គឺជាការពង្រឹងសមត្ថភាពស្ថាប័ន និងការដោះស្រាយបរិបទពិបាកៗនៅក្នុង វិស័យកម្ម ព្រមទាំងភាពស្មុគស្មាញក្នុងការរចនាគម្រោង»។
កសិករម្នាក់ កំពុងស្រោចស្រពដំណាំរបស់ខ្លួននៅសង្កាត់ជ្រោយចង្វា
តាមរបាយការណ៍វាយតម្លៃឯករាជ្យ ការខិតខំរបស់ ADB ក្នុងការពង្រឹងខ្សែសង្វាក់តម្លៃកសិកម្មរបស់កម្ពុជា តាមរយៈកំណែទម្រង់គោលនយោបាយ គឺជាសកម្មភាពមួយដែលមានសក្តានុពល។ ការផ្តល់ហិរញ្ញប្បទានសម្រាប់កម្មវិធីអភិវឌ្ឍន៍វិស័យពាណិជ្ជភាវូបនីយកម្មស្រូវ-អង្ករដែលធន់នឹងអាកាសធាតុដែលកំពុងបន្តអនុវត្តត្រូវបានរៀបចំឡើងដើម្បីជួយដល់កសិករក្នុងខេត្តបាត់ដំបង កំពង់ធំ និងព្រៃវែង ក្នុងការបង្កើនផលិតកម្ម និង ប្រសិទ្ធផល ព្រមទាំងខ្សែសង្វាក់តម្លៃស្រូវ-អង្ករនិងដោះស្រាយឧបសគ្គរាំងស្ទះផ្នែកគោលនយោបាយសម្រាប់ខ្សែសង្វាក់តម្លៃទាំងនេះឱ្យបំពេញមុខងារដោយរលូន។ នេះគឺជាចំណែកមួយនៃក្រុមគម្រោងខ្សែសង្វាក់តម្លៃដែលគាំទ្រដោយ ADB នៅកម្ពុជា និងបណ្តាប្រទេសជិតខាងក្នុងគោលបំណងបង្កើនភាពប្រកួតប្រជែងក្នុងវិស័យកសិកម្មនៅតាមតំបន់ដែលត្រូវបានជ្រើសរើសតាមបណ្តោយរបៀងដឹកជញ្ជូននៃមហាអនុតំបន់មេគង្គ។
បញ្ហានិងកត្តាប្រឈមនានាដែលកើតឡើងក្នុងប្រទេសកម្ពុជាមានលក្ខណៈស្រដៀងគ្នាទៅនឹងបញ្ហានិងកត្តាប្រឈមដែលបានរកឃើញនៅក្នុងតំបន់ផងដែរ។ បញ្ហាប្រឈមចម្បងៗសម្រាប់គម្រោងកសិកម្មដែលទទួលបានមូលនិធិគាំទ្រពីADBរមែងតែងមានឫសគល់ពីបញ្ហានៅក្នុងការរចនាគម្រោង និង និរន្តរភាព ដោយសារស្ថាប័នទន់ខ្សោយ និង ការផ្គត់ផ្គង់មិនគ្រប់គ្រាន់សម្រាប់ប្រតិបត្តិការ និងការថែទាំ។
ទោះយ៉ាងណាក្តី ក៏មានចំណុចវិជ្ជមានគួរឱ្យកត់សម្គាល់ផងដែរ។ ការងាររបស់ADBនៅតំបន់ទន្លេសាប (ដែលកំពុងចាប់ដៃគូជាមួយមូលនិធិអន្តរជាតិសម្រាប់ការអភិវឌ្ឍន៍កសិកម្មដើម្បីទាញប្រយោជន៍ឱ្យបានជាអតិបរមាពីជំនាញឯកទេសក្នុងការធ្វើការងារជាមួយជនក្រីក្ររបស់មូលនិធិនេះ) កំពុង ផ្តល់ផលជាវិជ្ជមាន។ គម្រោងកាត់បន្ថយ ភាពក្រីក្រតាមបឹងទន្លេសាបនិងការអភិវឌ្ឍកសិករខ្នាតតូចដែលបានចាប់ផ្តើមក្នុងឆ្នាំ ២០០៩ កំពុងគាំទ្រដល់រដ្ឋាភិបាលក្នុងការបង្កើនការអភិវឌ្ឍដែលមានការរុញច្រានពីសហគមន៍ តាមរយៈការវិនិយោគទៅលើហេដ្ឋារចនាសម្ព័ន្ធជនបទ ការកែលម្អផលិតភាព ការអភិវឌ្ឍសមត្ថភាព និង ការកែលម្អលទ្ធភាពក្នុងការទទួលបានហិរញ្ញប្បទានសម្រាប់កសិករខ្នាតតូច៕
（សរុបព័ត៌មានដោយ សមុទ្រ）
（ប្រភពព័ត៌មាន: kohsantepheapdaily.com.kh, adb.org, postkhmer.com,cen.com.kh）
មតិពីមិត្តអ្នកអាន