ថ្ងៃទី២៨ ខែឧសាភា ឆ្នាំ២០១៩ លោករដ្ឋមន្ត្រី វេង សាខុនរដ្ឋមន្ត្រីក្រសួងកសិកម្មរុក្ខាប្រម៉ាញ់និងនេសាទ បានទទួលជួប Dr. Alexandre Huynh តំណាងអង្គារ FAO ប្រចាំនៅកម្ពុជា ដឹកនាំក្រុមការងារជំនាញផ្នែកសុខភាពសត្វ និងសហការីដែលអញ្ជើញមកពីទីស្នាក់ការអង្គការស្បៀងអាហារ និងកសិកម្ម នៃអង្គការសហប្រជាតិប្រចាំទីក្រុងបាងកក និងអង្គការ OIE ផងដែរ។ ជំនួបនេះមាន បំណងធ្វើការពិភាក្សាទាក់ទងនឹងវិធានការអង្កេតតាមដាន ត្រួតពិនិត្យ ការពារ និងទប់ស្កាត់ជំងឺ ឆ្លងប៉េស្តជ្រូកអាហ្វ្រិក។
តំណាងអង្គការFAOព្រួយបារម្ភរឿងជម្ងឺជ្រូកប៉ិស្ត៍អាហ្រ្វិកនៅកម្ពុជា
សូមអនុញ្ញាតបញ្ជាក់ជូនថាតាមរយ:ការអញ្ញើញជាផ្លូវការរបស់អគ្គនាយកដ្ឋានសុខភាពសត្វ និងផលិតកម្មសត្វ ក្រុមការងារជំនាញផ្នែកជំងឺប៉េស្តជ្រូកអាហ្វិ្រកដឹកនាំដោយ Dr. Fillip Claes បានមកបំពេញទស្សនកិច្ចនៅកម្ពុជាចាប់ពីថ្ងៃទី ២៧ ដល់ថ្ងៃទី ៣១ ខែឧសភា។ ក្នុងជំនួបពិភាក្សា Dr. Fillip បានរាយការណ៍ជូនលោករដ្ឋមន្ត្រីជ្រាបដោយសង្ខេបពីបច្ចុប្បន្នភាពនៃស្ថានភាពជារួមនៃជំងឺប៉េស្តជ្រូកអាហ្វិកទាំងក្នុងពេលបច្ចុប្បន្ន និងវិធានការការពារ និងទប់ស្កាត់ជំងឺដ៏មហន្តរាយនេះនាពេលអនាគតផងដែរ និងជាពិសេសគោលបំណងសំខាន់នៃបេសកកម្មរបស់ក្រុមការងារមកកម្ពុជានាពេលនេះ។
លោករដ្ឋមន្រ្តីបានថ្លែងអំណរគុណ និងវាយតម្លៃខ្ពស់ចំពោះបេសកកម្មរបស់ក្រុមការងារជំនាញដែលបានអញ្ជើញមកធ្វើបេសកកម្មនៅកម្ពុជាដើម្បីតាមដាន និងផ្តល់ការគាំទ្រផ្នែកបច្ចេកទេសក្នុងការផ្សព្វផ្សាយពីបញ្ហាជំងឺ វិធានការការពារ និងទប់ស្កាត់ជំងឺប៉េសត្តជ្រូកអាហ្វិ្រកនេះ។ លោកបន្ថែមទៀតថា ដោយយល់ឃើញពីហានិភ័យនៃគ្រោះមហន្តរាយនៃជំងឺនេះដល់ឧស្សាហកម្មជ្រូក កន្លងមកក្រសួងបានណែនាំឲ្យអគ្គនាយកដ្ឋានសុខភាពសត្វ និងផលិតកម្មសត្វចាត់វិធានការយ៉ាងម៉ឺងម៉ាត់ដោយត្រូវសហការជាមួយអន្តរស្ថាប័ន រដ្ឋបាលថ្នាក់ក្រោមជាតិពិសេសខេត្តជាប់ព្រំដែនជាមួយប្រទេសវៀតណាម សមាគមអ្នកចិញ្ចឹមជ្រូក ផលិតករ អាជីវករ ដោយត្រូវរូមគ្នាអនុវត្តយ៉ាងខ្ជាប់ ខ្ជួននូវខ្លឹមសារនៃសារាចរណែ នាំលេខ១១៩ សរណន.កសក ចុះថ្ងៃទី២១ ខែកុម្ភៈ ឆ្នាំ ២០១៩ ។
បើយោងតាមរបាយការណ៍របស់សមាគមអ្នកចិញ្ចឹមសត្វកម្ពុជា ដែលកោះសន្តិភាពទទួលបានកាលពីម្សិលមិញនេះ បានឲ្យដឹងថា តម្លៃជ្រូករស់នៅតាមបណ្ដាខេត្តនានានៅ កម្រិតមួយខ្ពស់គួរសមក្នុងនោះ ខេត្តកណ្ដាលមានតម្លៃខ្ពស់ជាងគេ ដែលក្នុងរបាយការណ៍បង្ហាញថាមានតម្លៃរហូតដល់ ១១៦០០រៀលក្នុងមួយគីឡូក្រាម ខណៈខេត្តរតនគីរី ដែលជាខេត្តផ្ទុះជំងឺ ប៉េស្តជ្រូកអាហ្វ្រិក ក៏មានតម្លៃ ១០៦០០រៀលដែរក្នុងមួយគីឡូក្រាម ដូច្នេះមានន័យថាជ្រូករស់ក្នុងស្រុក នៅតែមានហាងឆេងខ្ពស់បើធៀបនឹងពេលដែលបានធ្លាក់ចុះ កាលពីឆ្នាំមុន ។
ជាងនេះទៅទៀត ក្រសួងក៏បានណែនាំឲ្យប្រធានមន្ទីរ និងមន្រ្តីពេទ្យសត្វខេត្តជាប់ព្រំដែនប្រទេសវៀតណាមទាំង ០៧ ត្រូវបង្កើនស្មារតីយកចិត្តទុកដាក់ ប្រុងប្រយ័ត្នខ្ពស់ដោយត្រូវអនុវត្តខ្លឹមសារាចរណែនាំលេខ១១៩ ឲ្យមានប្រសិទ្ធភាព បើមានការផ្លោះផ្លោយនឹងត្រូវប្រឈមមុខចំពោះវិធានការរដ្ឋបាល និងវិធានការច្បាប់។ ដោយឡែកអ្នកចិញ្ចឹមជ្រូក ម្ចាស់សត្តឃាតដ្ឋាន អាជីវករលក់សាច់ អ្នកនាំចូលជ្រូក ក៏ត្រូវចូលរួមសហការអនុវត្តសារាចរណែនាំនេះឲ្យមានប្រសិទ្ធ ភាពផងដែរ។
លោករដ្ឋមន្ត្រីបានជូនពរឲ្យបេសកកម្មរបស់ក្រុមការងារជំនាញនេះ ទទួលបានជោគជ័យ និងសុខសុវត្ថិភាព ហើយអគ្គនាយកដ្ឋានសុខភាពសត្វ និងផលិតកម្មសត្វត្រូវផ្តល់កិច្ចសហការឲ្យ បានពេញលេញល្អ ប្រយោជន៍ដើម្បីសុវត្ថិភាពនៃជំងឺប៉េស្តជ្រូកអាហ្វ្រិកក្នុងវិស័យឧស្សាហកម្មជ្រូកនៅកម្ពុជាទាំងពេលបច្ចុប្បន្ន និងពេលអនាគត។
គួរបញ្ជាក់ថាជម្ងឺនេះកន្លងមកបានឆ្លងចូលពីប្រទេសវៀតណាមមករាតត្បាតមកដល់ខេត្តរតនគិរី ធ្វើឲ្យជ្រូកអ្នកស្រុកកើតជម្ងឺនេះ ហើយត្រូវសម្លាប់ចោលរាប់រយក្បាលទៀតផង៕
（សរុបព័ត៌មាន ដោយ សមុទ្រ）
មតិពីមិត្តអ្នកអាន