អគ្គលេខាធិការ គណៈកម្មាធិការជាតិ អូឡាំពិកកម្ពុជា បានប្រកាសប្រាប់ឱ្យដឹងថា ប្រទេសកម្ពុជា ត្រៀមដាក់បញ្ជូលកីឡា ជាង ៣០ ប្រភេទ ដើម្បីចូលរួមប្រកួតកីឡាស៊ីហ្គេម នៅវៀតណាម លើកទី៣១ ឆ្នាំ២០២១ ខាងមុខនេះ ដោយមានកីឡា ៤០ ប្រភេទ ដែលត្រូវប្រកួត ។ ព្រឹត្តិការណ៍ កីឡាស៊ីហ្គេម លើកទី៣១ នៅវៀតណាមនេះ គ្រោងនឹងធ្វើ នៅរដ្ឋធានីហាណូយ ចាប់ពីថ្ងៃទី២១ ខែវិច្ឆិកា ដល់ថ្ងៃទី២ ខែធ្នូ ឆ្នាំ២០២១ ។
លោក វ៉ាត់ ចំរើន អគ្គលេខាធិការ គណៈកម្មាធិការជាតិ អូឡាំពិកកម្ពុជា
លោក វ៉ាត់ ចំរើន អគ្គលេខាធិការ គណៈកម្មាធិការជាតិ អូឡាំពិកកម្ពុជា បានមានប្រសាសន៍ថាៈ មកដល់ពេលនេះ វៀតណាម បានជ្រើសរើសកីឡា ប្រហែល ៤០ ប្រភេទ ដែលត្រូវប្រកួត ក្នុងព្រឹត្តិការណ៍ស៊ីហ្គេម លើកទី៣១ ឆ្នាំ២០២១, ហើយក្នុងប្រភេទកីឡាទាំងនោះ កម្ពុជាបានជ្រើសរើសកីឡា ប្រហែលពី ២០ ទៅ ៣០ ប្រភេទ ដែលសុទ្ធសឹងជាកីឡា ដែលមានសក្ដានុពល ដើម្បីឈានទៅដណ្តើមមេដាយ ជូនជាតិមាតុភូមិ ។ ប៉ុន្តែយើងអត់ទាន់កំណត់ និងជ្រើសរើស នៅឡើយទេ ដោយវៀតណាម នៅមិនទាន់រៀបចំប្រភេទកីឡា ដែលហៅថា ការកំណត់ចុងក្រោយ ។ ទោះបីជាយ៉ាងណា ចំនួនប្រភេទកីឡា ទាំងអស់នោះទេ វៀតណាម នឹងប្រកាសជាផ្លូវការ នាពេលឆាប់ៗនេះ ។
លោក បានមានប្រសាសន៍ទៀតថាៈ សម្រាប់ការប្រកួត ខាងមុខនេះ មជ្ឈមណ្ឌលជាតិហ្វឹកហ្វឺន កំពុងរៀបចំយុទ្ធសាស្ត្រ ក្នុងការពង្រឹងសមត្ថភាពកីឡាករ កីឡាការិនី គ្រប់ប្រភេទកីឡា ឱ្យកាន់តែខ្លាំងក្លាបន្ថែមទៀត ដើម្បីឈានទៅសម្រេចបានជោគជ័យ ។
លោកបានបញ្ជាក់ថាៈ នៅដើមឆ្នាំ ឬពាក់កណ្តាល ឆ្នាំ២០២១ កម្ពុជា ក៏ត្រៀមបញ្ជូនកីឡាករ កីឡាការិនីកម្ពុជា ជាង ១០០ នាក់ ទៅហ្វឹកហាត់ នៅក្រៅប្រទេស ជាពិសេសនៅសាធារណរដ្ឋប្រជាមានិតចិន ដើម្បីត្រៀមប្រកួត ក្នុងព្រឹត្តិការណ៍ស៊ីហ្គេម លើកទី៣១ នេះផងដែរ ។ លោកបានបញ្ជាក់ទៀតថាៈ សម្រាប់កម្ពុជា គឺមានប្រភេទកីឡា ដែលមានសក្តានុពល ក្នុងការឈានទៅដណ្តើម មេដាយ មានដូចជា តេក្វាន់ដូ ប៉េតង់ ជឺជិតស៊ូ គុនខ្មែរ វាយកូនបាល់ ប្រដាល់សកល វ៉ូវីណាម សីដក់ និងចំបាប់ ជាដើម ៕
（ហេង វុធ្ធ）
（ប្រភពព័ត៌មាន: https://www.rasmeinews.com/）
