យុគសម័យ - សមាគមប្រជាជាតិអាស៊ីអាគ្នេយ៍បូក ៣ (អាស៊ានបូក ៣) ត្រូវបានរំពឹងថា នឹងរក្សាបានភាពរឹងមាំ ដោយកំណើនសេដ្ឋកិច្ចនឹងគ្រាន់តែថមថយតិចតួចប៉ុណ្ណោះក្នុងឆ្នាំ ២០១៩
យោងតាមរបាយការណ៍ស្តីពីចក្ខុវិស័យសេដ្ឋកិច្ចតំបន់អាស៊ានបូក ៣ (AREO) ឆ្នាំ ២០១៩ ដែលចេញផ្សាយកាលពីថ្ងៃពុធដោយការិយាល័យស្រាវជ្រាវម៉ាក្រូសេដ្ឋកិច្ចអាស៊ានបូក ៣ (AMRO) កំណើនសេដ្ឋកិច្ចក្នុងតំបន់នេះត្រូវបានរំពឹងថា នឹងថមថយបន្តិចមកនៅត្រឹម ៥,១ ភាគរយនៅឆ្នាំនេះ និង ៥ ភាគរយក្នុងឆ្នាំ ២០២០។
រដ្ឋមន្ត្រីក្រសួងហិរញ្ញវត្ថុអាស៊ានបូក ៣ ក្នុងកិច្ចប្រជុំនាពេលកន្លងមក។
របាយការណ៍នេះបានចង្អុលបង្ហាញថា ក្នុងរយៈពេលខ្លី ហានិភ័យដែលតំបន់នេះប្រឈម គឺភាគច្រើនជាហានិភ័យខាងក្រៅ ហើយហានិភ័យធំជាងគេ គឺនៅតែជាការកើនឡើងនៃភាពតានតឹងផ្នែកពាណិជ្ជកម្មពិភពលោកដោយសារការហូតពន្ធនាំចូលបន្ថែមដោយសហរដ្ឋអាមេរិក ដែលត្រូវបានកំណត់ថាជាផលប៉ះពាល់មធ្យមហើយអាចឈានទៅរកផលប៉ះពាល់ខ្លាំង។
តំបន់នេះក៏អាចត្រូវរងគ្រោះផងដែរដោយបញ្ហាភាពងាយប្រែប្រួលនានាពីចលាចលទីផ្សារហិរញ្ញវត្ថុ ដោយសារការរំពឹងនានាអាចផ្លាស់ប្តូរភ្លាមៗ។ យោងតាមរបាយការណ៍នេះ តំបន់អាស៊ានបូក ៣ ស្ថិតក្នុងស្ថានភាពល្អ ដើម្បីជម្នះនឹងឧបសគ្គនានាដែលកើតចេញពីការធ្លាក់ចុះតម្រូវការខាងក្រៅ។
របាយការណ៍នេះបានបង្ហាញទៀតថា ដើម្បីដោះស្រាយហានិភ័យរយៈពេលខ្លី និងរក្សានិរន្តរភាពកំណើន អ្នកបង្កើតគោលនយោបាយប្រចាំតំបន់នេះ គួរតែកែតម្រូវភាពចម្រុះនៃគោលនយោបាយមួយ ដែលឆ្លើយតបទៅនឹងស្ថានភាពវិលជុំ (វដ្ដ) នៃសេដ្ឋកិច្ចរបស់ប្រទេសនីមួយៗរៀងៗខ្លួនក្នុងវដ្ដពាណិជ្ជកម្ម និងវដ្ដឥណទាន ព្រមទាំងតួនាទីខាងក្រៅ និងភាពងាយទទួលរងគ្រោះផ្នែកហិរញ្ញវត្ថុរបស់ពួកគេ។
ក្នុងការចេញផ្សាយនៅឆ្នាំនេះ របាយការណ៍នេះដាក់បញ្ចូលការសិក្សាពីប្រធានបទដែលមានចំណងជើងថា៖ «ការបង្កើតការតភ្ជាប់ និងសមត្ថភាពសម្រាប់សេដ្ឋកិច្ចថ្មី» ដែលអំពាវនាវឲ្យតំបន់នេះទាញយកប្រយោជន៍ពីស្ថានភាពដែលបំពេញបន្ថែមឲ្យគ្នាទៅវិញទៅមក ឱបក្រសោបបច្ចេកវិទ្យា និងពង្រឹងការធ្វើសមាហរណកម្មពហុភាគីនិយម និងក្នុងតំបន់។
របាយការណ៍នេះត្រូវបានចេញផ្សាយនៅក្រៅជំនួបនៃកិច្ចប្រជុំប្រចាំឆ្នាំលើកទី៥២ របស់ធនាគារអភិវឌ្ឍន៍អាស៊ី (ADB) ដែលមានរយៈពេល ៥ ថ្ងៃ នៅទីក្រុងណាឌី ប្រទេសដីកោះហ្វីជី ដែលបានចាប់ផ្ដើមកាលពីថ្ងៃពុធ ស្ថិតក្រោមប្រធានបទ «វិបុលភាពតាមរយៈការឯកភាព»៕
(ប្រភព៖ Phnom Penh Post សរុបព័ត៌មានដោយ សំណាង)
មតិពីមិត្តអ្នកអាន