យុគសម័យ- ទីភ្នាក់ងារអភិវឌ្ឍន៍របស់រដ្ឋាភិបាលជប៉ុន (JICA) បញ្ជាក់ថានឹងបន្តផ្តល់ជាជំនួយឥតសំណង និងកម្ចីសម្បទាន បើទោះបីជាថ្មីៗនេះបានលក់ភាគហ៊ុនដែលធ្លាប់កាន់កាប់ចេញពី PAS ក៏ដោយ។
JICA នៅក្នុងខែនេះបានសម្រេចលក់ភាគហ៊ុនទាំងអស់ដែលបានទិញពី PAS កាលពីឆ្នាំ ២០១៧ ពេលកំពង់ផែធំជាងគេរបស់កម្ពុជាមួយនេះបានឡើងផ្សារហ៊ុនទៅឲ្យក្រុមហ៊ុនដែលមានជំនាញផ្នែកប្រព័ន្ធឡូជីស្ទីកដ៏ធំមួយរបស់ជប៉ុន។
ការសន្យាពីរដ្ឋាភិបាលជប៉ុនទាក់ទងនឹងការបន្តបង្កើនកិច្ចសហការជាមួយ PAS ត្រូវបានប្រកាសក្នុងសេចក្តីជូនដំណឹងរបស់ JICA បន្ទាប់ពីលោក Shigenori Ogawa អគ្គនាយកនៃអគ្គនាយកដ្ឋានអាស៊ីអាគ្នេយ៍ និងប៉ាស៊ីហ្វិករបស់ JICA បានធ្វើទស្សនកិច្ច PAS កាលពីថ្ងៃទី ២៤ ខែ ឧសភា និងបានពិភាក្សាកិច្ចសហប្រតិបត្តិការពេលអនាគតសម្រាប់កំពង់ផែនេះ។
ទីភ្នាក់ងារអភិវឌ្ឍន៍របស់រដ្ឋាភិបាលជប៉ុន (JICA) បានបង្ហាញពីការតាំងចិត្ត
ក្នុងការបន្តគាំទ្រការអភិវឌ្ឍកំពង់ផែស្វយ័តក្រុងព្រះសីហនុ (PAS) បន្តទៀត
តាមសេចក្ដីប្រកាសរបស់ JICA បន្ទាប់ពីកិច្ចប្រជុំនេះ ទីភ្នាក់ងារអភិវឌ្ឍន៍រដ្ឋាភិបាលជប៉ុន បានឲ្យដឹងថា ខ្លួននឹងបន្តគាំទ្រ PAS លើទិដ្ឋភាពដ៏ទូលំទូលាយសម្រាប់ការអភិវឌ្ឍកំពង់ផែ និងការលើកកម្ពស់តំបន់សេដ្ឋកិច្ចពិសេសតាមរយៈជំនួយឥតសំណង កិច្ចសហប្រតិបត្តិការបច្ចេកទេស និងកម្ចីសម្បទាន។ សេចក្ដីប្រកាសរបស់ JICA បង្ហាញថា ភាគីទាំង ២ គ្រោងនឹងចុះហត្ថលេខាលើកិច្ចព្រមព្រៀងសហការនៅខែមិថុនា។
ស្របពេលដែលខេត្តព្រះសីហនុកំពុងមានកំណើនយ៉ាងគំហុកពីការវិនិយោគរបស់ជនជាតិចិនដោយមានកាស៊ីណូ សណ្ឋាគារ ភោជនីយដ្ឋាន និងផ្សារទំនើប ដោយមានសញ្ញាសម្គាល់ច្បាស់ជាអត្តសញ្ញាណចិន កំពង់ផែស្វយ័តក្រុងព្រះសីហនុនៅតែមានកិច្ចសហការស៊ីជម្រៅជាមួយរដ្ឋាភិបាលជប៉ុននៅឡើយ។ វិនិយោគិនចិន មិនទាន់បានចូលទៅ PAS ចុះនៅឡើយ។
នៅពេល PAS បានបោះផ្សាយលក់ភាគហ៊ុនជាសាធារណៈលើកដំបូងកាលពីខែមិថុនា ឆ្នាំ ២០១៧ JICA បានទិញភាគហ៊ុន ១៣,៥ ភាគរយ នៅក្នុងក្រុមហ៊ុននេះ៕
（ប្រភព៖ .postkhmer.com កែសម្រួលដោយសំណាង）
មតិពីមិត្តអ្នកអាន